| Nummer:oub1763 | Datum:Breslau, 8. April 1420 | Overlevering:Editie | Vindplaats:Ostfriesisches Urkundenbuch, II, S. 723, nr. 1763 |
König Sigismund ertheilt dem Häuptling Sibet von Rüstringen die Vollmacht, bestimmte Gebiete des Jeverlandes und Ostfrieslands im Namen des Königs zu regieren, und legt ihm die Verpflichtung auf, eine jährliche Abgabe zu entrichten.
Sigismundus etc. Notum facimus etc. Quamquam regalis munificencia erga universos imperii sacri fideles de innata sibi clemencia quadam favoris gracia merito liberalis existat, ad illos tamen uberius sua debet liberalitatis dona extendere, quos pro ipsius sacri imperii honoribus fama celebris fervencioribus testatur studiis desudare. Sane habito respectu ad fidei constanciam et utilia fidelitatis obsequia maiestati nostre ac sacro imperio per nobilem Sybotum, capitaneum in Rustringen, nostrum et imperii sacri fidelem dilectum hactenus exhibita et imposterum eo quidem prompcius exhibenda et que ipse nobis eo amplius pro ceteris exhibere tenetur, quo ampliora se cognoverit a nobis beneficia suscepisse, sicut eciam ad id ipsum faciendum alias coram strennuo Syfrido de Wemdingen milite et Nieolao Bunczlaw, ducatus nostri Wratislaviensis cancellariis, ambasiatoribus et nuncciis nostris specialibus et fidelibus dilectis, suis iuramentis corporalibus se astrinxit, quemadmodum eciam hoc sue littere super hoc date clarius attestantur: Idcirco animo deliberato, sano principum, comitum, nobilium, procerum et fidelium nostrorum accedente consilio et de certa nostra sciencia universas et singulas gracias, libertates, immunitates, franchesias, iura, privilegia et litteras, que et quas provincie Ostergaw et Westergaw cum aliis districtibus in Frisia occidentali a nobis alias obtinuisse noscuntur, eidem Syboto, heredibus et successoribus suis dedimus, donavimus et contulimus, damus, donamus ac de plenitudine potestatis Romane regie presentibus conferimus; graciose decernentes ipsas et ipsa in omnibus suis punctis, clausulis, sentenciis et articulis, ac si tenores ipsarum et ipsorum forent presentibus de verbo ad verbum inserti, exnunc inantea perpetuam habere roboris firmitatem. Insuper de innata nobis clemencia prefato Syboto virtute presencium ex speciali nostra gracia favemus, concedimus et liberaliter indulgemus, ut exnunc inantea provincias infrascriptas, videlicet Rustringen, Buten-yaden et Bovenyaden[*] districtus in Jewer cum ipsarum pertinenciis universis, item districtum Ostergerland cum Gheist, Mersse[*] et Wangerland in partibus Frisonum orientalium, qui Ostfriesen vulgariter nuncupantur versus Oldenburg situatis, quarum maior pars ob tuicionis et proteccionis presidium ad ipsius predecessores et ad eum dinoscitur confugisse, que omnes nobis et sacro Romano imperio sunt subiecte, nostris et eiusdem imperii vice et nomine habere, tenere, regere, tueri et tam diu gubernare debeat, valeat atque possit, quam diu predictarum provinciarum incolis sub eius proteccione, defensa seu tutela placuerit demorari. Et in recompensam provinciarum huiusmodi sibi per nos sicut premittitur concessarum prefatus Syboto, heredes et successores sui, nobis et nostris successoribus, Romanis imperatoribus et regibus, centum florenos monete Renensis pro tributo annuo, cum in annis Domini scribetur, anno Domini Mo CCCCo XXIIIIo incipiendo super festo ascensionis Domini annis singulis solvere debebit effectualiter et pagare. In casu autem, quo unius aut plurium predictarum provinciarum incole ab eius, heredum et successorum suorum proteccione et gubernacione successu temporis se vellent abstrahere ac comunibus (sic) Frisonibus adherere, extunc eosdem liberos dimittere ac eis id ipsum nequaquam debebit quomodolibet prohibere, nos eciam et nostri in imperio successores in predicto centum florenorum Renensium tributo annuo certam quantitatem pecunie iuxta provincie, que se eorum obediencie subtraxerit, estimacionem seu valorem ipsis relaxare ac defalcare debebimus tocies quocies fuerit oportunum, dolo et fraude quibuslibet penitus procul motis. Mandamus igitur universis et singulis nostris et imperii sacri officialibus, subditis et fidelibus, cuiuscumque status, gradus seu condicionis extiterint, presentibus et futuris firmiter et distriete, quatenus prefatum Sybotum, heredes et successores suos in predictis nostris graciis nequaquam impediant, quinpocius circa huiusmodi nostro nomine manuteneant, protegant et defendant, prout indignacionem nostram etc. Presentibus usque ad nostram aut successorum nostrorum revocacionem tantummodo duraturis. Presencium etc. Sub maiestate. Datum Wratislavie, anno etc. XXo, octava die Aprilis.[*]
Per d. L., comitem de Oetingen, magistrum curie.
Johannes Kirchen.
Per d. L., comitem de Oetingen, magistrum curie.
Johannes Kirchen.
