| Nummer:oub1479 | Datum:23. Febr. 1496 | Overlevering:Editie | Vindplaats:Ostfriesisches Urkundenbuch, II, S. 493, nr. 1479 |
Der Emder Bürger Bernd Vrese bekennt sammt seiner Frau Anna und deren Bruder Heine Mathys vor dem Pfarrer Boyo Meyena, dass ihnen die ihnen aus dem Nachlass der Eltern Anna's und Heine's zukommenden 10 Rheinischen Gulden im Namen der Grafen von Ostfriesland durch den Pfarrer Herm. Wessels gezahlt seien.
Ick meister Boyo Meyena, decretorum doctor, kerckhere to grote Phalren unde vicarius perpetuus de kecken Embden, bekenne unde betuge apembar in unde vermits dusseme myneme apene bezegelden breve vor alsweme, wo vor my is gekomen de beschedene Berndt Vrese, burger in Emeden, unde bekande mit sampt Annen, siner elichen huesfrouwen, unde Heynen Mathijs, oreme broder, bekennende sampt eyndrachtigen, dat se to eren willen unde vuller genoge heben entfangen unde upgeboert van deme erhafftigen meister Hermen Wessell, kercheren tho Emeden, uth bevele des eddelen unde wolgeborn heren Edzarts, graven to Oistfreislant, mynes gnedigen leven heren, sodane teyn goldene enckell Rinsche guldene, als Annen unde Heynen vurscr. moder van zeligen Hinricke Mathijs in sineme testamente mildichligen synt gegeven, unde de genanten Berndt unde Heyne noch jemant anderst van den frunden sullen noch willen dusser vurscr. sake halven, als van den teyn Rinsgulden vurscr., neyne furtir ansprake doyn noch doyn laten mit jenigen gerichte, geistlick effte wertlick, unde heben des to borgen gesath, de dinge wo vurscr. stede unde vast to holdene, de beschedene Uko Sibekena unde Hilbrandt Jagers, burgers to Emeden. Des so heben Bernt unde Heyne gelovet dussen vurscr. borgen dusser loffte alse wareborgen schadeloiss in guden truwen vermits handtastinge woll to benemene unde den machtbreff van Geseken Boessen, Heynen unde Annen vorscr. moder, dar de burgen vurscr. mede gefryet sullen syn, hijr tor stede sullen unde willen bringen unde overleveren szunder argelist. Dat dusse puncte alle wo vurscr. vor my meister Boyen doctor vurscr. alduss gescheyn synnen, orkunde ich mit mynen ingesegel beneden an dussenn breff gehangen. Datum anno Domini Mo CCCCto XCVIo, ame dingstedage na Invocavit.
