| Nummer:oub1163 | Datum:14. April 1486 | Overlevering:Editie | Vindplaats:Ostfriesisches Urkundenbuch, II, S. 233, nr. 1163 |
Mecko Tyardsna zu Uphusen verkauft dem Tyade Ayltsna zu Emden den dritten Theil von Tyada Emken's Haus auf der Kirchstrasse in Emden.
Ick Mecko Tyardsna, inwoner tho Uphusen, bekenne unde betughe in unde vermyds desseme apene bezeghelden breve voer alsweme, dat ick myt vryen wyllen unde voerberaden mode hebbe verkoft unde verkope jeghenwardich in kracht dusses breves tho enen steden vasten ewighen erfkope deme ersamen manne Tyaden Ayltsna, borger in Emeden, unde synen erven of anerven, een derden deell van Tyada Emken huses myt den twen halven gevelen, staende upp der suderen sytt van Gherolt Wyartsna strate, anders genomet de Kerckstrate, daer Houko Ubben saliger dechtnisse hues negest bysteyt uppe dat oesten, unde Acko Brungersna hues negest bysteyt uppe dat westen, voer vyftych Arensgulden, de my Mecko vorg. degher, vull, all unde wall, de erste penninck myt deme lesten, tho myner vuller noghe unde wyllen is untrichtet unde betaelt, des ick eme dancke; unde ick Mecko vorgenant unde myne erven off anerven scolen unde wyllen deme upgenanten Thyaden unde syne erven of anerven dat voergheroerde derde part hueses myt den twen halven gevelen vry unde qwijtt warende wesen aller ansprake, gheestlikes oft wertlikes rechtes tho ewijghen tijden, alle arghelist, hulpereden unde nye vunde uthghesecht. Hijr by, an unde over synt ghewesen de eersamen mans Hayko Heronken[*] unde Hayo vlaskoper, borghers der upgenanten stadt Emeden, als tugheslude daertho gheesket unde ghebeden. In urkunde unde merer .tuchnisse der waerheyt hebbe ick Mecko Tyardsna vorg. ghebeden de eersamen unde voersychtighen mans Nomo Meckena, Hompo Hayena, Berent van Duten unde Ghert van Gelren, borgermeysters der vilgheroerden stadt Emeden, dat see dessen breef voer my myt des staedes ingezeghel wulden bezegelen, deme wy Nomo, Hompo, Berent unde Ghert, borghermeysters vorg., umme Mecken frundliker bede wyllen so hebben ghedaen, unde hebben des stades inghezeghel wytliken heten hanghen beneden ant spatium s breves, de ghegheven is ame vrydage voer deme sondaghe Jubilate, in dem jare unses Heren dusent veerhundert ses ende achtentich.
