| Nummer:oub0861 | Datum:4. April 1468 | Overlevering:Editie | Vindplaats:Ostfriesisches Urkundenbuch, I, S. 748, nr. 861 |
Der Emder Bürger Heinrich von Buldern verkauft dem Gerd von Geldern in Emden eine Warfstätte daselbst.
Ick Hinrick van Buldren, borger in Emeden, bekenne unde betughe openbar in kracht dusses breves voer allen goeden vromen luden, de ene zeen offte horen lesen, dat ick myt vryen wyllen unde walberadenen mode unde myt wulbort Vibbeken, myner echten husvroen, hebbe vorkoft unde vorkope tegenwordich in unde myt krachte dusser scryft to ene steden vasten ewyghen arfkope deme beschedenen manne Ghert van Gelren, borger in Emeden, unde Ghertrud, syner[*] echten husvrowen, unde eren rechten erffnamen, enen warf, gheleghen bynnen Emeden, tusken her Johan Ludemans, unsen karker to Emedens, nyge bode an de ene syde unde Hermen Gholtsmedes bode an de ander syde, unde lycht an de strate, de vor den vorbenomeden boden hen gheyt unde strecket achter in de lenghe an Hille Hymen warf; vor ene summe geldes, de my Hinrick vorghescreven to mynen vullen wyllen[*] unde noghe, de erste pennich myt dem lesten degher unde ael ghotliken wal betaelt unde untrychtet ys, des ick de vorscreven Gherde vorghenoemt[*] hochlike dancke; myt ael sulken underschede unde vorworden, off yemant in nakomeden tyden up sodane warff als vorgheroert[*] ys yenigherleye ansprake edder claghe doen volde, dat Ghert edder synen erwen hyr yenigherleye hynder off scaden wan queme, des ick my doch nycht vormode, so wyl unde schal ick Hinrick vorghenoemt, [*] unde myne rechte erven, boren unde ungheboren, [*] dussen vorghenomende warff vrey unde qwyt buten synen scaden umbekummert rechtes stedes vastes ewyghes erffkopes sunder alle ansprake gheyslikes unde wertlikes rechtes vrey umbekummert leddich unde loes to ewyghen tyden warende wesen, [*] to holdende, to besyttende, to brukende, to vorsettende offte to vorkopende, wo[*] hem unde synen erwen des belevet sunder alle[*] argelist, hulperede, neyewunde offte yenigherleye intoch, de dussen breef nederlegghen offte krenken mochte. Hy weren[*] vor tugeslude mede by unde an unde ower de ersamen mester Ebe, Herman Snyder, Wessel Schror, borgers in Emeden; alzo tughe der warheyt, [*] so hebbe ick Hinrick vorghescreven ghebeden den ersamen borgermestres umme unser statsegel (van) Emeden vor dussen breef to hanghen, des wy[*] Johan van Vinsen, Noume Meckena, Abele van Sogel, Johan van Linghen unser statsegel hebben heten hanghen an dussen breef um Hinrichs vorscreven vrunliker bede wyllen.[*] Ghescreven na der bort Christi MoCCCCo unde LXVIIIo, up sunte Ambrosius dach des hylligen lerers dach etc.[*]
