| Nummer:oub0792 | Datum:10. Aug. 1463 | Overlevering:Editie | Vindplaats:Ostfriesisches Urkundenbuch, I, S. 689, nr. 792 |
Der Hamburger Rath schreibt nach der wegen der Emder Angelegenheit zu Aurich gehaltenen Tagfahrt an Junker Ulrich mit der Aufforderung, wegen weiterer Verhandlungen Abgesandte nach Hamburg zu schicken.
Deme erbaren joncheren Oelrike to Greetzyl, Aurike, Emden unde Oestvreszlande etc. hovedlinge, unsen bisundern leven frunde.
Unsen vrundliken grued unde wes wy gudes vormoghen tovoren. Erbare leve joncher unde guede vrund. Soe alze juwe leve unde ok die juwe myt den unsen latesten to Aurike in vorhandelinge weren van Emeden wegene etc., dar denne ene scrifft up vorramed werd, sodane vorhandelinge unde scrifft hebben uns die unse myt deme allerbesten ingebracht, unde wy to gueder mathe wol vornomen. Alze juw denne die unsen do furder ghesecht hadden, dat en bederve duchte, dat gy de juwe daerumme by uns in unse stad sendeden, dar furder in unde uth to seggende unde handelende soe dat billikest worde, wente wy in sodanen saken nycht endelikes doen mochten noch konden, men moste dat ersten an unse borgere bringen. Alsoe, leve joncher, duncket uns noch nutte, datt gy die juwe van der weghene, wanner juw dat bequemest is, by uns schicken in unse stad uppe dat zee unde wy ene guede limplike unde redelike wyse vorramen, die wy voert an unse borgere bringen moghen, unde is sodanen den juwen geleydes by weghelanck behoeff, willet uns tydliken die gennen, we de siin, die gii senden willen, unde van weme me sodane geleide irwarven schoele, namhafftich maken, willen wy uns daerinne myt flyte guetliken gerne bearbeiden, dat wy sodanne geleide vorwarven moghen efft wy konen. Die unse hadden ok nycht vorgheten, do zee to Oldenboreh quemen, sunder myt deme eddelen heren Gheerde, to Oldenborch unde Delmenhorst greven, umme den juwen leyde to ghevende, ghesproken, die on daerupp gheantwordet hedde, dat hie deme alzoe gerne doen wolde, soe wy dat van on vorstaen hebben. Unde waer wy juw to willen wesen mochten, deden wy gerne, dat kennet God, die juwe leve wolmoghende spaer in zalicheit; unde begheren dessen juwe gutlike bescrevene antworde. Screven under unsser stad secrete. Ame dage sunte Laurencii, anno etc. LXIIIo.
Consules Hamburgenses.
Unsen vrundliken grued unde wes wy gudes vormoghen tovoren. Erbare leve joncher unde guede vrund. Soe alze juwe leve unde ok die juwe myt den unsen latesten to Aurike in vorhandelinge weren van Emeden wegene etc., dar denne ene scrifft up vorramed werd, sodane vorhandelinge unde scrifft hebben uns die unse myt deme allerbesten ingebracht, unde wy to gueder mathe wol vornomen. Alze juw denne die unsen do furder ghesecht hadden, dat en bederve duchte, dat gy de juwe daerumme by uns in unse stad sendeden, dar furder in unde uth to seggende unde handelende soe dat billikest worde, wente wy in sodanen saken nycht endelikes doen mochten noch konden, men moste dat ersten an unse borgere bringen. Alsoe, leve joncher, duncket uns noch nutte, datt gy die juwe van der weghene, wanner juw dat bequemest is, by uns schicken in unse stad uppe dat zee unde wy ene guede limplike unde redelike wyse vorramen, die wy voert an unse borgere bringen moghen, unde is sodanen den juwen geleydes by weghelanck behoeff, willet uns tydliken die gennen, we de siin, die gii senden willen, unde van weme me sodane geleide irwarven schoele, namhafftich maken, willen wy uns daerinne myt flyte guetliken gerne bearbeiden, dat wy sodanne geleide vorwarven moghen efft wy konen. Die unse hadden ok nycht vorgheten, do zee to Oldenboreh quemen, sunder myt deme eddelen heren Gheerde, to Oldenborch unde Delmenhorst greven, umme den juwen leyde to ghevende, ghesproken, die on daerupp gheantwordet hedde, dat hie deme alzoe gerne doen wolde, soe wy dat van on vorstaen hebben. Unde waer wy juw to willen wesen mochten, deden wy gerne, dat kennet God, die juwe leve wolmoghende spaer in zalicheit; unde begheren dessen juwe gutlike bescrevene antworde. Screven under unsser stad secrete. Ame dage sunte Laurencii, anno etc. LXIIIo.
Consules Hamburgenses.
