Die Gebrüder Voss verkaufen ihre Grundstücke in der Norderstrasse zu Emden an die Emder Bürger Bernd Winter und Swarte Arnd.

Witlik unde openbaer sy allen, de dessen breff zeen ofte horen lesen, dat wy Johan Voss, Wiltingk Voss unde Peter Voss brodere, Tydeman Vosses kindere seligher dechtnisse, myd vrigem willen unde wolberadenen mode ende vulboerde unsser negesten erfnamen unde frunde hebben redeliken unde rechtliken to eneme ewighen erfkope vorkoft unde vorkopen jeghenwardighen in desseme breve Bernd Wintere und Swarte Arnde, anders gheheten Arnd Kremer, borgheren bynnen Emeden unde eren erven, unsse hues myd deme werve van der straten an wente uppe den Delff, alse dat beleghen is in der Norderstraten, twisschen den erven unde huseren Heyne Wythoens in dat norden unde Hinric Godgrotzemy in dat suden, vor twelfftehalff stighe Arnoldusguldene, [*] de wy an reden telleden pennynghen, den ersten pennyngk myd deme lesten, genstliken unde to unsser vullenkomenen noghe van en entfanghen hebben, unde wy scholen unde willen den vorbenomeden Bernde unde Arnde desses huses unde werves een rechte warend wesen vor alle ansprake, also dat wy ofte unsse erven gheboren ofte ungheboren uppe dat vorbenomede hues unde werff nummer vurder upsaken edder manen scholen ofte moghen to ewighen tyden; weret aver, des God nicht en wille, dat de vorbenomede Bernd unde Arnd, ere erven ofte de holder desses breves myd erem ofte erer erven willen jenighen schaden ofte ansprake van desses kopes wegen deden ofte leden, darvan schole wy ofte unsse erven unde willen se ofte ere erven genstliken entheven unde benemen sunder alle arghelist. Hiir hebben an unde over ghewesen de erbaren manne Imel Haringhes voghed to Emeden, Johan Schulte, Menso Wiltinghes, Johan Rover, Albert Tydekens, Haytyt Enkena, Sybeke Herena unde Hoppe, borghere darsulves, sik sunderghen des to vordenckende; unde to vurderer bekandnisse unde groterer witlicheyd alle desser vorscr. stucke, so hebbe wy Johan Wiltingk unde Peter brodere vorbenomed anghevallen unde ghebeden den erbaren wysen man Idzerde to Emeden unde Norderlande hovetlinghe, dat he dessen breff myd sineme ingesegel, unde derghelyken de borghere to Emeden myd eres wicbeldes ingesegel umme unsser bede willen, unde nachdeme wy sulven nener inghesegele bruken, bevestened unde besegelt hebben. Na der bord Cristi veerteynhundert jaer, darna in deme veerteghesten jare, ame saterdaghe negest vor Epiphanie Domini.[*]

x

x

Fonds	Ostfriesisches Urkundenbuch, I
Fol.nr.	S. 455
Nr	512
Olim	Orig. im Rathsarchive zu Emden. Regest im Msc. Fol. 92 der Bibl. der Ostfries. Landschaft, fol. 21. Abschrift im Tabl. Emdense.
Jaar	1440
Datumcode	SaEpipha

x

x

Commentaar	Die Siegel fehlen jetzt. Emmius beschreibt sie also: "Sigillum Edsardi habet harpyam in sento simplice. Sigillum civitatis habet Cosmum et Damianum cum scuto minusculo in parte inferiore, et in eo medium leonem prosilientem ex undis cum circumscriptione in circumferentia: sigillum oppidi Emdensis." -

x

Materiaal	papier

x

Edities	E. Friedländer, Ostfriesisches Urkundenbuch I (Emden 1878), nr. 512