| Nummer:oub1524 | Datum:3. Febr. 1497 | Überlieferung:Editie | Fundstelle:Ostfriesisches Urkundenbuch, II, S. 528, nr. 1524 |
Der Häuptling Wiart Apkena zu Loppersum und seine Gattin Almeda stiften eine reich ausgestattete Präbende.
Wytlick, kundich unde apenbar (sy) allen erbaren, vromen, guden luden, gheyssliken yfft werliken personen unde luden, wo ick Wyart Aepken, tho Lopsum hovetlingh, unde Almeda, myn echte unde rechte vrouwe, hebben eendrachtlich ghegheven durch Got, umme Gades wille, umme salicheyth unser zelen unde unser vaderen unde moderen, zusteren unde broderen, unde all unzen lieven frunden zelen, tho eyner prebenden tho der ere Gades unde zyner benediede moder Marie, allen Gades hilghen, bezunderlingh in de eren sancti Anthonii des hilghen vaders, erve; eersten teyn grase etlandes, beleghen in dat Noerde, noch 3 grass by der Heuwe, twe langhe graze inna Thyadenghe fen, eyn gras inna tzurck- yfft kerckfen, noch eyn gras achter Willedes twe grazen, noch ghegheven tho zulven prebende eyn hues unde werff, dar dat hues up steyt teghen der Borchfoerde tho ewighen tyden, lant unde zant, erve unde hues, unde den werff vorghescr., unde 6 koye melk, dat zick dar moghen up ordineren unde wighe laten eersten Bernhardus Ubben van darzulvest tho Lopzum, de duchtighe klerck, unde dar eynen jederen[*] preester na preester tho ewighen tyden zunder jenigherleye in- offte wederzeghen van mynes, myner huesvrouwen unde alle de mynen, in zulker manyer unser kerckeden, dat de prebendaet, he zy we he zy, preester na preesteren, scholen doghetzam unde erlick darup holden tho hulpe unde nutte der hilghe kercke unde kerckheren horzam inne gotliken unde gheysliken arbeyt unde wercke, unde ock scholen bidden vor levendighe unde doden, unss tho ewighen tiden in memoria tho holden. Dusse beghyfftingh unde ztichtinghe dusser prebenden heb ich Wyart ghedan myt consent myne kerckhers in jeghenwardicheit veler vromer luden Ihn ewighen tiden bestandich tho blyven, eerst her Almars tho Abbinchwer, her Thyarkes tho Suderhuzen vicarius, Hero Poppen, Ytzo Acken, Enno Auwe, Emmo Zmyt unde anders foel tuechwerdigher mannen. Tho merer bevestinghe unde bestant dusser prebenden gheve ick Harmannus Ennen, tho Lopzum kerckher, dartho erffrente van Ezinghuzen, welk ick hebbe (van) befel van grave Edzart, unze landeshere, unde van den officiael tho Munster, mynen leven heran. Tho merer urkunde der warheyt hebben wy Harmannus Ennen, tho Lopzurn kerckher, unde Wyart, hovetlynch bavenghescr., unze signet offt inghezeghel wytliken ghehanghen an dussen breeff. Jares unses Heren dusent IIII hundert XCVII, [*] daghes Blasii mertilers.
