| Nummer:oub1465 | Datum:9. Nov. 1495 | Überlieferung:Editie | Fundstelle:Ostfriesisches Urkundenbuch, II, S. 476, nr. 1465 |
Der Pfarrer Heyko zu Norden bekundet die Auffindung eines Kaufbriefes, worin Sebern Tyabbersna dem Pfründner Hermann 12 1/2, Grase Landes im Eilsumer Hammrich verkauft.
Ick Heyko, medekercher to Norden, bekenne und betuge vor alssweme in dessem apenen besegelden breve, dat ick ghevunden hebbe ene hantscryfft und prothocoll heren Egberdes van Wener, medekercheren tho Norden saligher dechtnisse, inholden, dat Sebern Tyabbersna myt wolberaden mode hefft vorkofft unde jegenwordich vorkofft in und myt krafft desses breves enes steden, vasten, ewighen erffkopes deme beschedenen Herman provener derteyndehalleff grase landes, beleghen in Eelsumer hammerick, vor ene summe gheldes, de em de ergenomede Herman degher, all unde wall hefft vornoghet to synen willen, so dat he em des landes wil don ene rechte waringhe vor alle ansprake in jenighen gheestliken offte werliken rechten sunder alle arghelist, hulperede unde nyge vunde. Hijr weren bij tugeslude gheesschet de ersame her Egbert van Wener vorgenompt, Hinrike Harkenstede, Willer Smijt unde Remet Hedden. In merer bevestinghe unde tuchnisse der waerheit bebbe ich Heyko vorghescreven myn inghesegell witliken gehanghen ant spacium desses breves. Inne jare unses Heren dusent veerhondert vyff und neghentich, des neghesten daghes nha Willehadi episcopi.
