| Nummer:oub1452 | Datum:27. Aug. 1495 | Überlieferung:Editie | Fundstelle:Ostfriesisches Urkundenbuch, II, S. 464, nr. 1452 |
Bischof Heinrich von Münster bekundet von den Grafen Edzard und Uko von Ostfriesland das Versprechen erhalten zu haben, ihm in Folge des Schiedsspruches (Nr. oub1451) für seinen Verzicht auf Emden 10000 Rheinische Gulden zahlen zu wollen.
Wy Hinrick von Swartzburgh von Godes genaden bisscop to Munster unde administrator der hilligen kercken to Bremen, doen kundt unde erkennen in unde overmyts dessen unsen openen besegelden breve vor uns, unse lande, lude unde gestichte, nakomelinge unde manschap, dat wy in yunse wiss secker beholt, to unser ende unses gestichtes Munster nutte unde behoiff, entfangen hebben van den edelen heren Edtzarde, greven to Oestvreschlandt, unde zynen broder juncker Uken, theyndusent goldene Rinsche gulden, [*] de de vorser. greven uns guetliken unde leeffliken up hude, giffte dusses breves, geleent unde gehantreket hebben in mathen nabeschreven, so dat wy, unse nakomelinge, unse gestichte unde manschap nummer van unser wegen to geyner tyt umme dat slot unde stadt Emeden, dar wy umme myt den vurscr. greven to veeden gekomen weren, sprecken sollen off willen, off yenige vorderinge zus anders darumme laeten gescheen, wy off unse nakomelinge en hebben den upgemelten greven off eren ervent sodane summe van gulden bavengerort eyn jaerlanck tovoren in oer wisse secker beholt to willen guetliken betaelt unde to orer vuller genoge overgegeven unde gehantreket; unde dan, wan de betalinge in mathen vorbeschreven also guetliken uthgerichtet ys, willen unde sollen wy dan unde unse nakomelinge de gebrecke tusschen uns unde densulven greven erresen, verforderen unde handelen laten, nycht anders dan de scheydesbreeff tusschen uns unde enne vermyts den erwerdigen heren, heren Conrait, bisscop to Osenbrugge, unsen leven broder unde neven, uthgesprocken unde versegelt ys alle sunder argelist, geveerde unde nye vunde, de dessen unsen breeff gekrencken mochten ganss unde all uthgescheyden; unde dat dyt vorscreven so vestlich geholden soll werden, hebbe wy unse ingesegell voer uns, unse nakomelinge, witliken an dessen breeff doen hangen, unde to vorder vestnysse hebben wy de erberen unse leven andechtigen domdecken unde capittell unser kercken to Munster doen bewilligen, se dussen breeff up in mathen bavengeschreven myt uns bewilliget, beleyvet unde besegelt hebben, dat wy domdecken unde capittell vorgescreven so bekennen myt unsen genedigen heren sulck mede bewilliget unde gevulbordet hebben, unde in mathen vorbeschreven darumme unses capittells grote segell vor uns, unse nakomelinge witliken by dessen unses genedigen heren ingesegell gehangen. Int jaer unses Heren dusent veerhundert vyff unde negentich, des donredages na sunte Bartholomei apostoli dage.
