| Nummer:oub1019 | Datum:5. Juni 1479 | Überlieferung:Editie | Fundstelle:Ostfriesisches Urkundenbuch, II, S. 107, nr. 1019 |
Anderweite Beurkundung der Wahl des Johann von Boemel zum Propst von Langen.
Nos sorores Enne priorissa, Hebe et Ghebbeke cantatrices ceterique conventuales sexus utriusque monasterii sancti Jacobi in Langhen, Monasteriensis dyocesis, ordinis Premonstratensis, publice presentibus protestamur, quod matura deliberacione previa, premissa nichilominus, prout dignum erat, divini Spiritus invocacione, super electione prepositi et pastoris ecclesie nostre per resignacionem viduate, sacris eciam precedencium patrum nostrorum commonite institutis, electionum diversitates pretermittentes, certiori ac solide compromissi vie inherentes ab ordinis nostri Premonstratensis patribus approbate, unanimi consensu atque consilio consensimus et compromisimus, presencialiterque compromittimus et consentimus in dilectum confratrem nostrum et dilectas consorores, videlicet Jacobum priorem monasterii nostri predicti et Beleken suppriorissam, Ewerardam, Hebe seniorem, moniales, quatinus ipsi universorum ac singulorum vice eligant nobis et ecclesie nostre, sic ut prefertur viduate, pastorem et prepositum ydoneum, quem ipsi secundum Deum iudicio conscienciarum suarum duxerint eligendum. Cui eciam sic canonice per electores predictos electo omnes unanimiter et singuli secundum patrum decreta secundumque statutorum nostrorum tenorem fideliter intendimus obedire, dolis, fraudibus ac novis quibuscunque adinvencionibus seclusis. Quapropter ne nostra ecclesia pastoris solacio privata videretur, nos electores predicti dilectum ac discretum virum fratrem Johannem priorem novi claustri et professum monasterii Floridi Orti in nostrum prepositum elegimus ac per presentes eligimus et pastorem sic ut prefertur firmiter proponentes et eciam promittentes, quod huiusmodi electionem ratam ac validam tenebimus et tenemus, subiecturi colla nostra universi et singuli eiusdem sic electi ac postulati imperio, secundum venerabilium patrum precedencium sanxiones. Acta et facta sunt hec in presencia venerabilis patris nostri ac domini, domini N., abbatis in Merna, et venerabilis patris Johannis, abbatis in Florido Orto, ad premissa vocatorum specialiter et rogatorum. In cuius rei testimonium presens scriptum sigilli patris nostri abbatis munimine fecimus roborari. Anno Domini Mo CCCCo LXXIXo, ipso die sancti Bonifacii et sociorum eius martyrum.
