| Nummer:gus0761 | Datum:21. Sept. 1491 | Überlieferung:Original | Fundstelle:Rep. 1 (Große Urkundensammlung), inv.nr. 0761 |
Tyarck Wydgena in Engerhafe versöhnt sich mit der Kommende Abbingwehr.
Ich Tyarck Wydgena to Engherhave betughe jeghenwordich in krafft ende macht dusses apenen beseghelden breves voir alsweine, ze synt gheestlick offte wertlick, de dessen breeff zeen, horen eder lesen, woe ich Tyarck vorbenoempt goetliken in vruntscup byn ghesleten van deme vorsichtighen broder Awen, commenduer, ende den ghemenen conventskynderen des huses sunte Johannis baptisten to Abbingweere, umme saken, de wy hadden van Ennen, myns vaderssuster zaligher dechtnisse, van erve ende goedere weghen, de ze hadde ghegeven den voirscr. huse Johannis etc., soe dat ich Tyarck vorscr. gheve to ener afsone der goederen deme voirscr. huse sunte Johannis baptisten etc. twalff greze etlandes, beleghen in Uldersummer hamrick, ses greze in ener fennen unde ses greze in twen fennen. Dusse vorscr. erve ick Tyarck vorscr. updraghe unde quijtschelde voir my unde alle de myne, ze zint baren ende unghebaren, sunder alle ansprake, unde de vramen heren ende broderen des huses zunte Johannis voirser. dusse erve vorscr. moghen voirhuren, voirwesselen oft verkopen nae eren wyllen sunder al arghelist, hulprede edder nyge vonde, dair men dessen breeff mach mede voirkrencken offte nederleggen. Hijr hebben an ende over ghewezen als voir tugheslude gheesket heer Hinrik van Brae, kerchere to Uttum, Beno Lyvardzna, hovetling unde pravest darzulves, unde anders vele vrame lude. Tot merer tuechnisse der wairheit so hebben wy broeder Awo, commenduer, unde Tyarck vorscr. ghebeden den vorsichtighen kercheren here Hynrick to Engherhave ende den erbaren provest Benen um dussen breeff to bezeghelen, dat wy um bede willen unse inghezeghelen hebben doen wijtliken hanghen ant spacium dusses breves. Des daghes Mathei apoholi ende ewangeliste, int jaer unses Herrn dusent veerhundert unde een entneghentich etc.
x
| Archiv | NStA |
|---|---|
| Bestand | Rep. 1 (Große Urkundensammlung) |
| Zugangsnummer | R001 |
| Inventarnr. | 0761 |
| Jahr | 1491 |
| Datumcode | Matthe |