| Nummer:oub1778 | Datum:28. Juli 1435 | Overlevering:Editie | Vindplaats:Ostfriesisches Urkundenbuch, II, S. 740, nr. 1778 |
Die Hamburger Rathssendeboten bekunden, von einer Anzahl Einwohner zu Amdorf 26 Arnoldsgulden empfangen und Freundschaft mit ihnen geschlossen zu haben.
Wy Symon van Utrecht, Ludeke Melsingh unde Detleff Bremer, radessendeboden der stad Hamborgh, bekennen openbar in desseme breve, dat uns de vrome lade Lutet Eppena, Remet Roding, Wigert, Geerd, Abel, Ewe, Focke, Scharf, Ented, Terckes, Bonno, Johan, Hinric, Ubbo, Enno, Hayo, Hebbo, Arnd, Aynd, Wilke, Siab, Haveko Wilde und Johan schomaker, wonachtich to Amdorpe, hebben vornoghet unde gegeven to unse kosten ume vrundschop wil ses und twintich Arnoldusghulden, und, wy schollen unde willen ere vrunde na alze vor wesen, so dat ze schollen umbeschediget bliven van unz unde den unser; dergeliken schollen ze unse vrunde wedder wesen, sunder enigherleye argelist in ghuden truwen. Des to merer tuegnisse hebbe ick Symon van Utrecht myn ingesegel, des wy sametlike bruken, unde uns an genoget, [*] uppet spacium desses breves druken laten. Gegeven na Godes bord dusend veerhundert jar, darna in deme vif unde derttigeste jar, up sunte Panthaleonis daghe des hilgen martelers.
