Yneke zu Oswerden, seine Söhne und Brüder schliessen mit dem Häuptling Wibet von Esens und den Brüdern Edzard und Ulrich von Greetsiel unter Stellung von Bürgen Frieden.
Wytlich unde kundich zij dat allen ersamen luden, ryk unde armen, Vresen unde Dudesehen, de dussen breff zeen edder horen lesen, dat ich Yneke van Oswerden, Bebe myn sone, Uffe myn sone, Aybaldes myn sone, Hilryk, myne echten rechten sone unde myne rechten erven, Yne unde Aybe, myne echten rechten boren broders, unde ore rechten erven bekennen unde betugen in dussem jeghenwordigen breve vor alsweme, de en seen offt horen lesen, dat ich, myne erven, boren unde ungheboren, echte edder unechte, de to komen zin offt noch to komen scholen, unde wy Yne unde Aybe desghelyken hebben uns leffliken unde vruntliken vorvrunscoppet, voreynighet unde vorsonet myt vullenkomen wyllen myner unde myner erven unde vrunden, alse umme de scheling unde twydracht, de ghewesen hefft tuschen myr unde mynen rechten erven unde vrunden van der eynen ziit, unde tuschen Wypte, to Ezense hovetling, unde zinen erven, dat zij boren offte ungheboren, de to komen zin offte nocht to komen scholen unde alle denghennen, de umme eren wyllen don unde laten wyllen, unde hebbe my alsus myt mynen kynderen unde vrunden unde erven myt Wypte vorscr. unde myt zinen erven vorvrunscoppet unde sonet to ewyghen tyden, dat alle de twydracht unde schelinge, dat zij to komen wo dat to komen zij, nye offte olt, tuschen my unde mynen erven unde vrunden ghewesen hefft myt Wypte unde zinen erven unde vrunden, dat de altomale vorgheven unde dot wesen schal to ewyghen tyden so vorscr. ys, unser eyn uppe den andern nicht to vedende edder veden laten, claghen offte claghen laten, wer myt gheystlike rechte offte werlike rechte, sende dat alle de dedinghe, de in vortyden ghededinghet zin vormyddelst Focke Ukens unde Sybete saligher dechnisse tuschen Wypte vorscr, unde my, sende Wypte ore besegelde breve up hefft, dat de dedinge unde schedinge in vuller macht unde begryping yo bliven scholen, so Focke unde Sybet vorscr. dat tuschen uns ghemaket hebben to Ezensen in der kerken vor velen guden luden, unde darto unser eyn des anderen beste to donde myt lyve unde myt gude, daghes unde nachtes, unser eyn na des anderen ergeste nummermere to stande, dat zii bynnen lande offte buten lande. Ock so bekenne ich Yneke unde myne kynder unde erven unde myne vrunde, also wy vorscr. zin in dussen sulven breve, dat wy uns ok leffliken unde vruntliken voreynighet, vorvrunscoppet unde vorsonet hebben to ewighen tyden alse myt den twen ersamen vromen mannes, myt Edzarde, Ulryke broders, Ennen sones, hovetlingen to Gretsyl unde to Ezensen, myt en unde eren rechten erven, boren edder ungheboren, de to komen zin off noch to komen scholen, unde myt alle denghennen, de umme eren unde eren vrunden wyllen don unde laten wyllen, ze zin we se zin, in desser nabescreven wyse unde manere, dat ich Yneke unde myne kynder unde erven unde vrund vorscr. vorgheve unde hebbe vorgheven myt yeghenwordicheyt dussen breves Edzarde unde Ulryke vorscr., en unde eren erven, boren unde ungheboren, alle dat werdermot unde overval, den se uns myt eren vrunden unde knechten ghedan hebben, dat zy to komen an brand, an rove, an worden; in watte stucken yt to komen zij, dat schal altomale vorgheven wesen sunder alle arghelyst offte nyevunde, unser eyn uppe den anderen nummer to vedende offte veden laten, hemeliken offte openbare, unde nummer eyn up den anderen to claghen off claghen laten, wer myt gheystliken rechte offte werlike rechte, bynnen landes offte buten landes. Dusse vorscr. sone unde puntte stede unde vast to holdende unde nummermere to brekende, so love ich Yneke unde rnyne kynder vorscr., Yne unde Aybe, myne broders, loven unde sweren, hebben ghelovet unde ghesworen myt uprychtengen vyngheren, stavedes edes de sone Wypte unde zinen vrunden unde alle denghennen, de umme zinen willen don unde laten wyllen, Edzarde unde Ulryke, en unde eren erven unde alle denghennen, de umme eren willen unde erer vrunde don unde laten, so gude cristenlude to holdende to ewygen tyden nummermere tyeghen se to donde bynnen landes offte buten landes. Vortan to eyner groter wyssinge, uppe dat de sone unde loffte, de wy en dan hebben, suste vaster holdenden werde, so hebbe wy en darto borghen set dusse nabescreven lude, also in dat erste Meppe Ulferdesna, Myner to Damzum, Hylryk Eydesna to Oldentorpe, Ewe Ynghen sone to Elmersborch, Uffe Hallen to Ackum, Lubbe Ynen, Aylet Foken, Hicke Meysna. Dusse vorscr. lude hebben vor my unde myne kynder unde erven ghelovet myt samender hant de sone ock wol to holdende. Weret sake, dat ich offte myne kynder offte van unser wegen de sone inbreken, unde mochte dat bewysen, dat yt van unser wegen tokomen werd, so schole wy Wypte, Edzarde, Ulryke, also wy vorscr. borgen, gheven duzent Rynsche golden, unde dar nicht weder to spreken. Vortmere to eyner groten tuchnisse unde warheyt alle desser vorscr. wort unde loffte, so hebbe ich Yneke unde myne kynder unde broders ghebeden de ersamen vromen heren her Heren, her Haynge, her Johanne, kercheren to Ezensen, heren Frederk, kerchere to Westerbenzen, Ennet Syboldisna, dat se wol deden umme unser bede willen unde ok meer warheyt unde henghen ere inghesegel to dessen breve, so se ghedan hebben. De ghegeven unde ghescreven ys in dat jar unses Heren Mo CCCCo in dem XXXIIIIo, uppe den hilligen dach sunte Andrees, des hilgen apostels.
x
| Edities |
E. Friedländer, Ostfriesisches Urkundenbuch II (Emden 1881), nr. 1777 |
