| Nummer:oub1767 | Datum:16. Mai 1423 | Overlevering:Editie | Vindplaats:Ostfriesisches Urkundenbuch, II, S. 728, nr. 1767 |
Häuptling Ocko tom Brok schenkt dem Heinrich Godgrotzen das früher Hamburger Haus genannte Haus in der Kreuzstrasse zu Emden, doch behält er sich von der Warfstätte desselben eine jährliche Abgabe von 5 leichten Gulden vor.
Ick Ochs to Broke[*], Awreke[*] unnd Emede etc., hoveling in Oestfrieslandt, enkenne openbar vor alsweme[*], dat ick mitt beradene mode und mitt frygen wille, mitt volbordt all myns rades, hebbe to und overgeven Hinriek Godgrotsen[*] eyn huyss binnen Emede, belegenn by der crucestrate[*], dat hee selven gebuwet hadde und was wandages geheten der Hamborger hues, welcke hues und warffstede vors. ick em unde synen erven mid[*] synen boden und woninghen van boven und beneden mid der warffstede, dar dat hues up gebuwet is, velich und vryg gheve Hinrik vors. und synen rechten erven vor my, myne erven und vor alle myne nacomelynge, boren off' ungeborenn, to brukende, to besittende, to vorhuyrende, to vorstreckende und to vorkopende weme und wanneer, so vaken, hoghe off syde[*] eme off synen erven des lustet und to willen is, sunder myns off myner nacomelynghe vvedersprake off behindernisse, beholden my und mynen erven yarlykes vonn der warffstede to ghevende vyff lichten gulden. Alle argelist in dessen breve uthghesprokenn. To tughe so[*] hebbe ich myn ingesegell kenliken hanghen heten an dessen breff. Datum anno Domini duysent veerhundert vyff und twintich, in vigilia ascentionis (!) Domini.[*]
