| Nummer:oub1734 | Datum:4. Sept. 1400 | Overlevering:Editie | Vindplaats:Ostfriesisches Urkundenbuch, II, S. 693, nr. 1734 |
Bündniss zwischen dem Herzog Wilhelm von Geldern und Jülich, und Keno tom Brok, in welchem Letzterer verspricht, seine Schlösser dem Herzogs zu Lehn aufzutragen und sich ausbedingt, wenn der Herzog auf der Ostseite der Ems Eroberungen machen sollte, solche als Amtmann zu verwalten, auch sagt er zu, die Mannschaft des Herzogs mit Lebensmitteln zu versehen.
Ic Keene van dem Broeke, son wilnere heren Ocken van dem Broeke ridders, den Got genaide, bekenne ende betuge apenbare in diesme brieve, dat ic my mit dem durluchtigen hogeboren fursten, mijme lieven genedigen heren, heren Wilhelme, van Goids genaide hertogen to Gelre ende to Guliche ende greven to Zutphen, omme troist ende genaide, die mijn selige vader, her Ocke voirgen., ende ic an sijnen genaiden gevonden hebben ende verder te vynden hope, mit waelberaidenen moede ende voirdachten synne verdragen ende vereynt hebbe in der maten als her nae geschreven volgt. Also dat my de voirgen. mijn lieve genedige here behulplich wesen wille, dat ic quijt van den stede by hoen kome, so wille ende sal ic hem opdragen mijne slote, lande ende lude, dairmede he my weder alse voirt yn belenen wille, die ic van sijnre genaiden te leene ontfangen ende hem dairaf huldinge doen sal, als eyn man sijnen here schuldich is te doen. Ende desgelijchs sullen ic ende mijne erven dieselve slote, lande ende lude van den voirgen. mijnen lieven genedigen here, den hertoge van Gelre ende van Gulich, ende van sijnen erven, also ducke als dat geboerende wart, ontfangen, te hebben, te besitten ende te behalden, als ic sij tot hirtho vrij, loss ende ledich gehadt, beseten ende behalden hebbe. Weert oich sake, dat ic aflivich wurde sunder echte kyndere, so wille ende sal mijn genedige here voirgen. of sijne erven mijnen neesten van erven te erven dairmede beleenen in alle der malen, als ic dairmede beleent werde, ende dat sal ewelich ende alwege duren also lange, als erven dairnae volgen; mer die voirscr. mijne sloten, lande ende lude sullen dem voirgen. mijme genedigen heren van Gelre ende van Gutich ende sijnen erven open ende te volge wesen bynnen Vryeslant to allen tijden, wan sy des te doen hebben, op onse eyghen cost. Ende te deser voirscr. volge ende cost sullen ic of mijne erven dem vurgen. mijme genedigen heren of sijnen erven huldigen, die trouwelich te doen. Ende weert sake, dat mijn genedige here voirgen. of die sijne mit Goids genaiden Emeden off eynche andere slote of lande bekrechtichden of gewunnen bij oestsijde der Emesen, so wil he my, of wem ic wille, Emeden bevelen, ende die andere slote ende lande my of eyme van mijnre partijen, als sijnen amptluden. Were ever, dat de vurscr. mijn genedige here of die sijne ennige slote of lande gewunnen bij oestsijde der Emesen, die my of mijnre partijen bynnen tween jaren neestgeleden afgewunnen of nedergeworpen weren, die wille die voirgen. mijn lieve genedige here die mijne my wedergeven te halden ende te hebben van hem, als voirscr. steit. Weert oich, dat sij mijnre partijen geweest weren, die sullen sij van hem te leene ontfangen, ende gheven dairaf hergewede, als men verramen sal, wan die beleninge geschege. Voirt, wan id gevelt, dat de voirgen. mijn genedige here sijne lude senden wille yn Oestvryeslant, sijne andere lande te bekrechtigen an beiden sijden der Emesen, so sal ic ende mijne lude sijnen luden versorgen, den ritteren ende knechten, die te perde comen, provancie als sy behoeven, uytgescheiden byere ende haveren, ende den luden, die te schepe komen, sal ic ende de mijne lude gheven ende bestellen koevleysch ende eynen last botteren. Ende want de voirgen. mijn genedige here my te helpe in mijne slote ende lande veertich glayen[*] ende veertich schutten senden wille, den sullen mijne slote ende lande open ende mijne lude volgich wesen, sijne andere lande te bekrechtigen nae hoeren vermoegen; denselven sal ende wille ic besorgen alle leverancie der beyde, luden ende perden, te spijsende noit is ende te voederen. Ende so wat die voirgen. veertich glayen ende schutten van gevangenen gewynnen mit mijnen vrienden, die sal men yn Vryeslant schatten, overmitz des voirgen. mijns genedigen heren ende mijne vriende, die dairto gesat werden, ende so wat van den gevangenen kumpt, dat sal mijn genedige here voirgen. half hebben ende in die ander helfte te helpe mijnre cost. Alle ende yegeliche punte voirgen. hebbe ic Keene van den Broecke voirgen. voir mij ende voir mijne erven dem vurgen. mijme lieven genedigen heren, dem hertogen van Gelre ende van Gulich, ende sijnen erven yn goiden trouwen ende bij mijnre eren geloift, ende gelove mit desen selven brieve vaste, stede ende enverbrekelich te halden sonder enigerkunne argelist. Ende hebbe des te orkonde ende getuichnisse gantzer, vaster, ewiger stedicheit mijn segel voir my ende voir mijne erven mit mijnre wetenheit ende goiden wille an desen apenen brieff gehangen. Gegeven in den jaren onss Heren doe man schreyff dusent vyerhondert, des satersdages nae sente Johans dach Baptisten decollacio, dat was op den veerden dach van der maent Septembris.
