| Nummer:oub1722 | Datum:25. Febr. 1400 | Overlevering:Editie | Vindplaats:Ostfriesisches Urkundenbuch, II, S. 676, nr. 1722 |
Entwurf einer von Keno tom Brok auszustellenden Urkunde, laut deren er die Vitalienbrüder von sich lassen und den Hansestädten gegen die Heger derselben helfen will.
Witlik sy alle dengennen, de dessen breff seen edder horen lesen, dat ik Kene, her Ocken sone, hovetling tom Broke, bekenne und betughe openbare in dessem breve, dat ik mit guden willen und beradenen mode in guden truwen love hebbe und love den erbaren hern, borgermesteren und radmannen und eren nakomelingen der gemenen stede, de in der hense sint, dat ik wil und schal van my laten alle de vitalienbrodere, olt und junk, de ik uppe desse tid by my hebbe und de ik an mynen sloten und in mynem gebede geleydet hadde, so dat se my rumen scholen und enwech teen, to lande und nicht to watere, van stunden an, und dat ik und myne nakomelinghe und partye und alle myne vrund nummer to ewighen tiden willen und schullen sodane lude, de de hensestede ofte jenighen kopman beschedeghen, hemeliken ofte openbare velighen, heghen efte husen edder vordegedinghen; und werit dat jenich ander partye in Vreeslande ofte myne eghene partye und vrunde alsodane lude und zeerovers husede, hegede ofte verdegedingede, hemeliken ofte openbare, so wil ik und myne nakomelinghe und alle myne vrunde mit lyve und mit gude, mit unsen sloten, lande und luden dat na al unser macht keren, und de zeerovers vorstoren, und ok deghenne, de se heghet, huset, ofte vordegedinget hadden, ofte hegen, husen, ofte vordegedinghen, und dartho den steden truweliken behulpen wezen, sunder allerleye argelist. Alle desse vorgescreven stucke love ik Kene vorgescreven by truwen und by eren stede und vast to holdende, sunder allerleye argeliist. Und wy Folkmer Allen sone, hovetling van Osterhusen, Haro, hovetling van Valren, Sibern, hovetling to Lakwert, Enno, hovetling to Norden, junge Hero, hovetling to Dornen, losen mit dem vorgescreven Kenen alle desse vorgescreven stucke und en jewelik bisundern stede und vast und unvorbroken to ewighen tiden to holdende, sunder allerleye argelist; und des to tuchnisse hebbe wy unse ingesegele mit witlicheit mit Kenen vorgescreven ingesegel an dessen breff gehenget laten, de geven und screven ys na Godes hart in dem 1400 jare, in sunte Mathies daghe des hilgen apostels.
