| Nummer:oub1718 | Datum:1. Febr. 1400 | Overlevering:Editie | Vindplaats:Ostfriesisches Urkundenbuch, II, S. 673, nr. 1718 |
Keno tom Brok bekundet, dass seine Mutter Folkeld und er vom Erzbischofe Otto von Bremen mit dem Zehnten zu Nesse belehnt worden seien.
Ik Kene, hern Ocken sone van Broke, ritters, bekenne und betuge openbare in dessem breve vor alsweme, dat de erwerdige in Gode vader unde here, her Otte, ertzebischup der hilgen kerken to Bremen, myn leve gnedighe here, myne moder, vorn Folkelde, unde my heft belenet myd dem tegheden to Nesse myd syner rechticheyd unde tobehord, dewile wi bede levet, alze de breff utwiset, den (de) vorscreven unze here, her Otto, ertzebischup, darup uns ghegheven unde beseghelt hefft. Wanner aver myn moder, vor Folkelt, unde ik vorscreven beyde doet zint, zo schal de vorscrevene teghede myd syner rechticheyt unde tobehord wedderkomen to deme vorscr. mynen leven heren, hern Otten edder synen nakomelynghen unde to deme stichte van Bremen, alze he eer ghewesen hefft. To ener betughinge so hebbe ik Kene vorscr. myn ingheseghel ghehanghen to dessen breve. Datum anno Domini Mo CCCCo, in profesto purificacionis beate Marie virginis.
