| Nummer:oub1704 | Datum:24. Mai 1398 | Overlevering:Editie | Vindplaats:Ostfriesisches Urkundenbuch, II, S. 664, nr. 1704 |
Der deutsche Kaufmann zu Brügge zu die Hansischen Rathssendeboten zu Lübeck schreibt über die Flämischerseits beabsichtigte Expedition gegen die Vitalienbrüder.
Der deutsche Kaufmann zu Brügge zu die Hansischen Rathssendeboten zu Lübeck über die Flämischerseits beabsichtigte Expedition gegen die Vitalienbrüder ü. s. w. Alze wy ju to anderen tiiden hebben geschreven, wo dat dy vitalienbroders, dy Wytzold van dem Bruke in Freeslande to Marienhove upholt, in korten tiiden schaden hebben gedaen under dy zide van Flandren, warup dat land Flandren ghemenliken schepe geordineret hadde met wapenden volke, darmede sy meenden stark genuech to ziine, dy vorschrevenen vitalienbruders uter zee to dryvene: welk doch moste achterlaten zien umme keringhe und gebrekes willen von wynde. Worumme na der tit borgemestere, schepen und raed uns by en vorboden deden in dy camere, uns vraghende, wat raed wy hirto wisten, und vort, oft wi icht wisten underscheit van der leghentheit der watere und der lande, dar dyzuelven vitalienbroders in und ut vorkeren. Warup wy vorantworde, dat wy neghenen guden raed darto en wisten; mer wy hopende weren, dat ghii, heren, in juwer stat to der dachvard vorgaddert meenden dy zake to tractyrene und to handelne, in oval wize dy copman mest mochte beschermet to ziine.
