| Nummer:oub1703 | Datum:4. Mai 1398 | Overlevering:Editie | Vindplaats:Ostfriesisches Urkundenbuch, II, S. 663, nr. 1703 |
Der deutsche Kaufmann zu Brügge schreibt an die zu Lübeck versammelten Hansischen Rathssendeboten.
Der deutsche Kaufmann zu Brügge an die zu Lübeck versammelten Hansischen Rathssendeboten: meldet unter Anderem mannichfachen Seeraub, den die von Witzold tom Brok gehegten Vitalienbrüder begangen haben: ... Vort, heren unde sunderlinges vrunde, so hebben de vitalienbruederes, dye Wyczold van dem Broke in Vresland uphold unde huset, kort vorleden eyn schif genomen in Norweghen mit Wischmerschen bare, darvan de schiphere geheten is Egghert Schoeff van Danczik, mit welkes schipheren schepe desulven vitalienbruderes zeghelden uyt Norweghen vorby dat Zwen in die Hovede, unde dar so nemen ze wol 14 off 15 schepe, geladen mit alrehande gude, alse olye, was, wyn, riis, honech, talch unde vort mit alrehande gude, die me uyet Spanien unde uyt Franekrike pleget to brenghene, mit welken schepen vorscreven wol 5 barzen weren. Vort zo nemen ze up dezulven tiid eyn schip, dat uyt Enghelande qwam unde wolde int Zwen seghelen, darinne dat koplude van unsen rechte grot gut verloren hebben an golde unde an wunde, unde desulven koplude hebben ze mit en gevoret in Vreslande, alze wi vorstan hebben. Unde do ze alle desse schepe genomen hadden na eren willen, do vorkoften se dem vorscreven schipheren Eggherde Schoeff ein schip wedder umme ene summe geldes, darvore dat he en borghen unde ghizelers gesat hevet, welke de he losen moet by Witzolde in Vreslande. Ok so heft uns desulve schiphere Eggert Schof to kennen gheven, dat em de vitalienbroders boden unde bevolen, dat he uns segghen solde, dat se weren Godes vrende unde al der werlt vyande, sunder der van Hamborch unde der van Bremen, den en wolden se neghenen schaden doen, want se dar mochten komen unde aff unde to varen, wanner dat ze wolden ...
