Der Emder Bürger Bolardus tauscht mit dem Kloster Marienthal zu Norden eine grosse Reihe genau bestimmter Ländereien aus.

Wytlyck, kundich unde apenbaer sy allen erbaren vorsichtigen vromen luden, de demen apenen beseghelden breeff seen ofte horen lesen wodaenwijs, dat eyn ewich wesselynghe ghescheen ys tuschen Bolardus, borger to Emeden, van der enen sijd, und deme cloester to sunte Mariendael to Norden van der anderen sijd, van landes halven myt sulken beschede, dat de abbet van denen vorbenomeden kloester to Norden, heer Gheert Schulenborch ghenoemt, her Jorden unde her Lambert, preesters darsulves, suster Hysse priorisse, broder Gheert unde de ghemene conventeskynder, hebben gheven deme vorghenomeden Bolardus seven grase landes in Woltsseter hamrick, tuschen Pewesum unde Wachwert unde Woltseten beleghen, noch vijff grase landes in Lacqwarder hamrick, beleghen tuschen Lessekamperwech unde Nottenwech, gheheten Tettenmede, in welker venne Hompo Hayona, borghemester to Emeden, heft oeck[*] inne ligghen vijff grase; daer dat vorscr. kloester heft voer untfanghen van deme voerberoerden Bolardo twe grase meedlandes, beleghen in Rysummer hamrick, in ener vennen van vyff grasen, gheheten in de Slatynghemede by Ocketeneweeh, daer de dre grase junghe Freyd to Rysum van behorich synt, noch dre grase in Risummer hamrick beleghen by den Ockentenenwech, gheheten Weyndamede, daer junghe Ede by der westersyd by belandet ys, noch anderhalff gras, beleghen in Rysumer hamrick tuschen twen dyken in ener vennen, gheheten Taetkenvenne, streckende syck myt enem ende an den nyen dyck unde myt deme anderen ende am den olden dyck, item eyn gras buwlandes in Rysummer hamrick, ghenomet in de Ghare, daer Frederick Nannekens sone heft by lygghen eyn gras up de ostersyd unde de abbet eyn twede gras upt westen. Item eyn halff gras in de lutke Flasckesck, item eyn half gras in de Ecke Tene, beleghen in dersulften hamrick. Item noch daervoer untfanghen veerdehalf[*] grase buwlandes, beleghen in Manslachter hamrick, ghenomet Aynerskomp, daer de abbet to Norden by ervet ys myt eyn stucke landes, gheheten Hissenkomer. Unde dusse vorscr. wesselynghe sal staen unde macht hebben to des conventes beste voer dusse conventeskynder unde alle oer nakomelynghe unde des vorben. Bolardus unde synen erven unde anerven to ewigen tyden unde syner eliken huesfrowen Elseke ghenomet, unde de ene sal deme anderen unde wedderumme vry land leveren sunder alle ansprake jenighes rechtes. Tugheslude hijrto gheropen unde ghebeden synt ghewest de erbaren mans Johaneken Kremer unde Mencke van Haren, borghers to Emeden. In eyn orkunde merer warheit hebben wy her Gheert Schulenborch abbet, her Jorden, her Lambert unde suster Hisse, priorisse etc., unse conventes seghel witliken hanghen benedden to dussem breve. Na der boert Christi unses Herrn vijfteynhundert, ame avende Thome des hillighen apostels.

x

x

Fonds	Ostfriesisches Urkundenbuch, II
Fol.nr.	S. 641
Nr	1672
Olim	Orig. Perg. im Archive der Gesellschaft für bildende Kunst etc. zu Emden.
Jaar	1500
Datumcode	vThome

x

x

Commentaar	Das spitzovale Siegel ist schlecht erhalten, man erkennt noch eine weibliche Figur (?) in geistlicher Tracht unter gothischem Baldachin, und von der Umschrift: ... vallis beate Marie.

x

Materiaal	papier

x

Edities	E. Friedländer, Ostfriesisches Urkundenbuch II (Emden 1881), nr. 1672