| Nummer:oub1667 | Datum:19. Okt. 1500 | Overlevering:Editie | Vindplaats:Ostfriesisches Urkundenbuch, II, S. 638, nr. 1667 |
Testament des Albert Barnecate.
Ich mester Wychman Cremer, kerckher to Ezens unde commissarius scholastrie der hilligen kercken to Bremen, do kunth apenbaer bekennende an unde avermiddelst dussen apenen testamente, wodanewys Alberth Barnecate, kranck van lycham, jodoch sterck unde mechtich syner synne unde gheestes, he angezeen hevet, nicht sekers des dodes unde nicht unzekers der uhre des dodes, darmede hevet he int erste Gade almechtich syne sielen bevalen, unde den starflichen lycham der eerden in jegenwordicheit des weerdigen hilligen sacramentes unde tuechwerdigen nahescreven. Int erste hefft Alberth vorbenompth ghegheven Martino Ubben, secretario unde richter des gestrengen unde ernstvasten (!) her Heren van Dhornum, to Ezenze, Stedesdorpp unde Wytmunde heeren, unde Greten synre huesvrowen, dat hues belegen an Martinus hues, myt allen den guederen unde schulden intomanen, gelik in Wychmans selliger dechtnisse rekensboech worth gevunden, de guedere to ghebruchen Martinus unde Greten leventh lanck; dan na orer beyder doeth schollen de guedere in de ere des almechtigen Gades. Das sodane gelth, als hebben Martinus unde Grete in den vorberorden huze, willen dath Martinus unde Grete gheven in de eere Gades, steyth to orer beyde willen unde wolgevalle. Furder hevet Alberth quitgeschulden unde vry gheven Arnde Berncaten, synen steffvader, sunder clage de schulde unde guedere, desulfte Arnde was vorplegen Alberte gelych na utwyzinge Wichmans seligen rekensboeek, uthgenamen twe koye unde eyn paer ossen, vor 8 Rinsgulden, dewelck de prior to cloester (!) daervoer boeth to gheven, unde eyn paer peerde, ith wer zache de de egedachte Arnth umme Gades wyllen wolde entfanghen unde ghegeven hebben; gedencket he des nicht to donde, schall he sodanne gueder, als gerort, Martino unde Greten betalen. Vurder hefft ghegeven my, mester Wychman, enen Rinsgulden to biddende vor zyne zielen. Noch ghegeven ter Clues eynen Rinsgulden to enen passe, noch 30 missen schall men lezen laten to cloester. Item Alberth is vorplegen dre Rinsgulden den manne, de myt ene van Rome reyzede. Hyr mede, by, an unde aver vor tueghe toghebeden, ghewest unde geropen zyn de framen tuechwerdigen borgher in Ezenze, Johan Vresse unde Comius Cannengheter. To merer orkunde der waerheit hebbe ick mester Wyehman Cremer bavenbenompt myn inghesegell to der ere Gades unde salichheit Alberdes milder dechtnisse leven sielen beneden an dessen testamente unde laesten wyllen wytlichen ghehangen sunder argelist. Ghehandelt unde ghescreven des dages na Luce ewangeliste, in dem jare vyfteynhunderth.
