Der Johanniterordens-Balleier von Westfalen, Komtur von Steinfurt und Lage, Herbort van Snetlage, und die Oberen des Hauses Steinfurt inkorporiren unter Darlegung der näheren Bedingungen die Ordenshäuser Hasselt, Hesel und Brokzetel dem Hause Abbingweer, was Graf Edzard bestätigt.
Wy Herbort van Snetlaghe, balyer up Westphalen, commendur der huser Stenforde und Laghe, Clavves van Rynen prior, Johan van Geysteren pietancyenmester und ghemeyne conventzheren des vorg. huses to Stenforde, ordens sunte Johans baptisten, doen kunt, enkennen und betughen apenbaer vor uns unde unse nakomelynghe, dat wy myt unsen guden vryen wyllen unde rypen berade heben gheincorporert und incorporeren in krafft ende macht dusses unses breves unse ordenshusere Harszell, Heszell end Bockesaete myt alle eren tobehorynghen, reppelick und unreppelick, deme husze to Abyngweer ewelick tho besittene ende tho brukene, umene sunderlynghe zake uns doertho bewegene, sonderlinx umbe godesdenst to vormerene ende ordensrecht in eren tho holden, upp sodass maneyren ende bescheyde, dat de commendur to Abyngweer, wo de in tyden ys, sal holden vijff ordensheren tot eme, oer ghetyde tszamene indt koer tho lezene alle daglee, ende dessulven ghelyken mysze, vesper und complete tho synghene dagelix. Vorder szo sall emen Harszell nycht vorhuren, idt szall gescheyn myt vulboerdt ende medewettene des balyers und commendurs und ghemeynen conventzheren des vorg. huses to Stenforde, ende szo zall dat hues to Abyngweer daerto vorbunden weszen, daer stede eynen prester t holden. Vor. deralle rechtycheide, de dusze vorg. husere plychtich weren t done deme huse to Stenforde vor duszer incorporacyen, daer sall dat hues to Abyngweer ghans, all und heell vor oben, dat zo uithtorychtene vor itlick hues, als men dat plecht van older ghewonten end rechtycheydt tho holdene. Ende weer dat zake, dat dusze vorbenompten articule alszo nycht en ghescheyghen end geholden worden, so vorg. steyt, so moghen de balyer und commendur in der tijt und ghemeynen conventzheren des vorgescreven huses tho Stenforde dusze incorporacyen wederumme roepen ende vornychtyghen ende de commenduer zo Abingweer sall vorvallen wessen in vyfftych Overlendeschen golden Rynschen guldene den husze und conventn to Stenforde vorg. Upp dat dusze vorg. articule und incorporacye vastlyken sunder myddell geholden worden, so hefft dat hues to Abyngweer deme husze tho Stenforde eynen reverszaell weder hyrupp ghegheven myt des conventz seghell von Abynkgweer besegelt in allen maneyren all eens ludende sunder alle argelist und nye funde uithghesproken. Desz in oirkunde unde tuchnysze der waerheit so heben wy Herbort, balyer und commendur, Nicolaus van Rynen, prior, Johan van Geysteren, pietaneyenmester des vorg. huses to Stenvorde, unsze inghesegelle vor uns und dat ghemeyne convent des husz to Stenforde vorg. und vor unsze nakomelynge wytliken an dessen breiff gehangen. Datum anno Domini millesimo quadringentesimo nonagesimo nono, in profesto beati Martini episcopi et confessoris.
x
| Edities |
E. Friedländer, Ostfriesisches Urkundenbuch II (Emden 1881), nr. 1646 |
