| Nummer:oub1632 | Datum:2. Aug. 1499 | Overlevering:Editie | Vindplaats:Ostfriesisches Urkundenbuch, II, S. 611, nr. 1632 |
Graf Edzard belehnt nach Einnahme der Groninger Umlande den Häuptling Hero Mauritz von Dornum mit den Lehngütern des aufsässigen Everd Lewe zu Godlinse.
Wy Edezardt, grave tho Oestfrieslanndt etc., doen kundt allermennichlichen unde bekennen mit dessen unsen openen besegelden breve voir alssweme, nachdem unde alls wy de gemeynen ummelande tuschen der Emsse unde Lawers hebben ingenomen, der meynonge de ungehoirsamen to billicher gehoirsamheit Romischer koniglicher majestait unde des hilligen reichs to bringen, unde einer genompt Everdt Lewen to Gotlinsse in denselven ummelanden geseten uns in voirgerorter gestalt ungehoirsam ende wederwertig, ouck anders loffloiss geworden unde gebleven iss, sick tegen uns gestrevet to den moitwilligen von Gronigen als ungehoirsamen Romischer konigl. majestait unde des hilligen reichs gegeven, sine huesser, erve unde guedere in der meynonge verflogen hevet, so hebben wy dairumme voirger. unde meer andere redelicher oirsake halven den wolduchtigen ende erberen unsen raidt unde leven getrouwen Hero Maurijs, to Dornhum ende Witmunda hovetlingck, sinen erven unde anerven, knechten unde megeden, umme sines getrouwen flitigen denstes willen, he uns in vorg. handel gedaen hevet unde vurder doen sall unde mach, mit des obgemelten Evert Lewens huser, erve unde guedere, repplicke unde unrepplicke, to Gotlinse ader anders in den ummelanden by Gronigen staende unde gelegen, versehn unde belient, so dat he, sine erven unde anerven, knechte ader megede sodanne hueser, erve unde guedere mogen angripen, to oren besten brueken, besitten unde der geneten up geboirliche plicht unde eide als eynen lehenman einen lheenheren to doende schuldich iss unde billich tosteidt, sunder des gemelten Everdt Leuwens ader siner erven wederseggent ader vurhinderunge. In urkunde der wairheit hebben wy unse rechte ingesegel witlichen an denen brieff heten hangen. Amme vridage na Petri ad vincula, anno Domini etc. nonagesimo nono.
