| Nummer:oub1627 | Datum:5. Juni 1499 | Overlevering:Editie | Vindplaats:Ostfriesisches Urkundenbuch, II, S. 607, nr. 1627 |
Der Häuptling Wiard Abekena zu Loppersum schenkt dem Kloster Aland zwei Grase Landes zu einer Stiftung von Seelmessen für Angehörige seiner Familie.
Ich Wyarth Abekena, hovetling to Loppsum, enkenne openbair yn dessen openen beseghelden breve, dat ick myt guden voirbedachten mode unde vryen willen umme salicheyt myner selen unde alle myner vrunde unde myner leven olderen benamen tovoren, hebbe ghegeven unde yn krafft desses breves tegenwordich gheve to eyner ewigen ghedechtnisse, yn sunden lyve, vulmechtich myner synne, deme convente to Alanth, yn latine gheheten 'Rypa beate Marie virginis', twe grase landes, gheheten langhe Nottye, belegen by des conventes 15 grasen upt sueden; welke twe grase sall unde mach de provest des conventes, nu tor tyd de erwerdige her Johannes Campis, unde syne nakomelinghe, brodere unde de ghestliken sustere darsulves, moghen unde scholen ghebruken to des conventes orber unde nutticheyt to ewigen tijden, unde bidden vor de selen, de van mynen gheslechte syn vorstorven. Unde vortmer so schelde ick dyt landt quyeth vor my unde myne anervenden, boren eder ungheboren, ick offte se dar nummer upp to sprekende offte antoklagende yn ghestliken eder werliken rechten to ewigen tyden sunder alle hulperede, argher list eder nye funde. Hyr weren mede, by, an unde over tugheslude, benamen de werdighe her Johannes Monasterii, commendator des huses Abbinghewere, her Gheerd Wulff, prebendatus to Hint, unde Ludeke van Duten, borghere yn Emeden, unde anders guder lude ghenoch. In orkunde der warheyt so hebbe ick Wyarth vorbenompt myn ingheseghel witliken doen hangen an dessen breff. Datum na der bord Christi dusent veerhundert neghen unde neghentich, ame daghe Bonifacii myt syner hilgen gheselschop.
