| Nummer:oub1526 | Datum:19. Febr. 1497 | Overlevering:Editie | Vindplaats:Ostfriesisches Urkundenbuch, II, S. 529, nr. 1526 |
Schiedsspruch in einer Streitsache zwischen Boelke und Heinr. Doseburch.
Anno etc. XCVIIo, am neisten sundage na Invocavit, heben wy gekorne schedeslude van beiden parten nabescreven, als twischen Boeleken unde Hinrick Doseborch, des unwillen halven twischen den beiden parten hangende, doch all gericht etc., eyne entlike fruntschuppe, dar beide parthe an heben belevet, oick by wilkor van vifftich golden Rinsgulden, halff in der heren handt unde half in des rades handt, dar nicht aff to treden, gededinget unde uthgesproken, so dat Hinrick Doesborch Boelcken vurscr. gutliken geven unde vernogen sall als nu dre weken na Paschen erstkomene achte golden Rinsche gulden in redem umbekummerden gelde, unde dairsulffs sall Doesborch vurscr. vernogen den voerstendern van sunte Annen ten broderen 1/2, golden Rinsgulden unde den vorstenderen van sunte Jurgen oick 1/2 Rinsgulden darsulffs. Item schedesheren van Boelcken wegen sint gewest de duchtige unde ersamen Hompo Haien, burgermester, Clawes Goltscmit, raitman, unde Reyndt Kuper, borger to Emeden. Item van Dosborchs wegen Remeth Ubben, Cordt Kremer, raitmenne, unde Janneken Kremer, borger darsulffs to Emeden. Item vor dit vurscr. gelt up tyt vorser. Boleken to versagen, oick sunte Annen unde sunte Jurien, hefft Janneken Kremer gelovet ende hantastinge gedaen gutliken to entrichten; unde hyrmede sullen dusse vorbenompten parthe mit oren frunden to beidenthalven aling unde all, gans hell, lefflich unde fruntlich to ewigen tiden gescheiden sijn, malckanderen in neynen nakomene tiden mit worden noch wercken dusser sake halven beth to vertornen noch verspreken; unde dit vorscreven sei men verstan boven datjenne, dat Dosborch Boleken vorscr. tovoren in botter unde heringe betalt hevet.[*]
