| Nummer:oub1506 | Datum:17. Okt. 1496 | Overlevering:Editie | Vindplaats:Ostfriesisches Urkundenbuch, II, S. 514, nr. 1506 |
Der Pfarrer von Gross-Faldern u. s. w. Boyo Meyena bekundet, dass Feyke Popkena zu Midlum dem Bolardus von Jemgum und dessen Frau drei genau bestimmte Grase Meedlandes im GrossMidlumer Hammrich verkauft habe.
Ick mester Boyo Meyena, decretorum doctor, kercher to Grotephaleren unde vicarius perpetuus der kercken Emeden, bekenne unde betuge apembar vermits dussem mynem apenen besegelden breve vor alsweme, wo vor my is gekomen de beschedene Feycke Popkena, kerspelman to Midlum, unde bekande, dat he mit guden vryen willen, vorbedachtes modes, hedde vercofft unde noch jegenwordich in unde mit krafft s breffs vercoffte vor sick unde sine erven to eynem steden, vasten, ewigen, unverbrokene erffkope deme ersamen Bolardo van Jemgum, borger in Emeden, Elseken siner eliger huysfrouwen unde orer beider erven effte anervendt, dree graze meetlandes, belegen in grote Midlummer hamricke int norden van koninck Redboldes weghe, upt oisten seligen mester Ryke t Herlte unde her Johann Schomakers, prebendat darsulffs, eyn fenne van achtehalff grase by liggende heben, vor eyne tsumme van gelde, dewelcke Feycko vorscreven bekande ome de erste penninck mit deme latesten van deme upgemelten Bolardo deger unde all to willen woll entrichtet unde betaelt were, des he ome hoichlichen bedanckte, unde lavede ome unde sinen erven dusses vorscreven landen vor sick unde sine erffgenamen in macht s breffs gude warscuppe to done vor alle ansprake geystlikes effte wartlikes gerichtes, wanner unde wo vakene on alsulcks van noden to done mochte werden, sonder jenigerleye argelist unde nye funde, dar men dussen breff mede bekrencken mochte, uthgescheiden. Thugeslude hyrto geropen sint gewest Johann Dewern unde Bernhardus Schom, [*] borgers in Emeden, unde Campo Mennena to Midlum. In merer orkunde der warheit so heb ick mester Boyo, doctor ergenant, myn inghesegel durch Feicken vurscreven bede willen beneden an dussen breff gehangen. Datum anno Domini Mo CCCCo XCVIo, quinta feria post Crispini et Crispiniani martyrum.
