| Nummer:oub1503 | Datum:14. Okt. 1496 | Overlevering:Editie | Vindplaats:Ostfriesisches Urkundenbuch, II, S. 511, nr. 1503 |
Häuptling Keno zu Loquard u. s. w. verpachtet dem Emder Bürger Arnd Scroder auf 30 Jahre 26 Grase Landes für 200 Rheinische Gulden Kapital, wofür er eine jährliche Rente von 12 Rheinischen Gulden zu geben verspricht.
Ick Keno, tho Loquart unde in deme Hamme hovetling, enkenne unde betughe in unde myt dussen besegelden breve vor allen gueden lueden, de dussen breff seen edder horen lezen van ghesliken offte werliken personen, wo ick hebbe vorkoft unde vorkoepe yeghenwordich in macht unde kracht dusses breves myt goeden berede, nuchteren modes, myt vullen wyllen, veerteyn grase etlandes, beleghen by Boerchwech, noch twelff grase fenlandes, ligghende by dat maer gheheten Ettafen, welkeer 12 grase ghewesselt synt vor teyn grase van den hillighen tho Rysum van Keno vorghescreven, unde de veerteyn grase vorgescreven synt ligghende in Rysummer hammerek by den Hereweech, deme bescheden manne Arent Scroder, borger tho Emeden, vor eyn summe geeldes, als vor twehundert Rynske gulden, welkeer summe geeldes my Keno vorghescreven Arent vorghenompt degher unde al hefft betaelt, des ich em dancke, unde dat myt duesdanighen beschede, so dat ick Keno offte deghene, de myn goeder offte heerlicheyt synt besittende, scal alle jaer gheven vor de twehundert Rynske gulden 12 goelden gulden, unde scal dusse vorgescreven erve bruken vor de renthe unde[*] ick vorgescreven Keno offte de mynen mach dusse vorgescreven erve wedderkopen in dertich yaren umme desulffte twehundert Rynske gulden als vorgescreven in. Wert saeke, dat des so nicht geschege, so oerleve ich Keno offte (de) myne unde orleff geve, dat Arent vorgescreven mach unde moet dusse vorgescreven erve vorsetten, vorkopen, vorwesselen, tho bruken vorgheven unde al syne vulle wille darmede doen nu unde tho ewich, unde ick Keno vorghenompt wil Arende ergenompt dusse vorgescreven erve eyn wys warer wesen vor alle aensprake van my offte mynen, van gesliken offte werliken, nu unde tot ewich, alle nygvunde, hulperede unde alle argelist uthgesecht, de dussen vorgescr. koep hinderen moeghen. Tuchnisse hijrtho geropen unde geeskeet: mester Syppo, vicarius to Loquart, her Johan, vicarius tho Rysum, her Sybrant, prebendaet to Rysum. To ener hogher kentenisse dusses waerheides, so hebbe ick Keno vorgeser. myn eghen insegel heten doen hangen byneden an dussen breff. To ener merer kentenisse dusses vorgescr. hebbe ick Keno mede gebeden mynen kerckheren, als her Focken, dussen breff myt my to my segelen (!); so hebbe ich her Focko umme bede willen dusse vorgescr. myn insegel doen hangen aen dussen breff. Item dyt is geschen int jaer unses Heren nae Goedes geboert als men screff dusent veerhundert ses unde tnegentich, op den dach Kalixti pape et martyris.[*]
