Das Johanniter-Ordenshaus Jemgum bekundet seinerseits den geschehenen Kauf und verspricht, das Kloster nach Holtgast zu verlegen.
Wy her Hayo commenduer, gemeyne priester, brodere unde sustere sunte Johanssorden to Jemghum in Reiderlandt bekennen unde betueghen mit desen unsen openen besegelden breve voir alszweine, so alls de edlen unde wolgebornen heren, herr Edenart unde junckhere Ukko, gebruedere, greven to Oestfrieszlandt etc., unse gnedigen leven heren, uns mit sunderlinge gueder gunst hebben overgelaten unde vurkofft voir eine redeliebe summe geldes, alls vierdehalffhundert Rinsche gulden, hundert demede landes, belegen int norden unde west vast an de Holtgast, nha vurmeldonge orer gnaden zegelle unde breve unssen convente derwegen gegeven etc., hebben wy oren gnaden, erven unde nakomelingen, weder overgegeven unde upgedragen alle ansprake, egendoem unde gerechticheit, de unnse convent in jeniger wise hevet ader mach krigen to jenigen waterlande beide int sueden, west ader norden by unde van der Holtgast belegen, dat na geynnet is, offte in anstainden tiden geynnet offte bedyket mach werden, dairumme nummer weder voir gestlichen noch werheltlichen richteren ader rechten to spreken, offte uns des to beclagen; beholden jodoch sunte Johansze unde unsen convente sodanne landt, alls selige her Edesardt, cornmenduer unses conventes, van heren Ulbede, abte to der Munte, wandages gehofft hevet na luede segell unde breve derwegen gegeven, de wy hirmede nicht dencken to krencken noch to vurlaten. Dairto sollen unde willen wy unse convent unde hovetcloister Jemghum mit den ersten leggen unde furderen to der Holtgast, dair nu unsze voirwerck is, welck wy ouck unszen gnedigen leven heren voirgenompt so hebben gelavet unde togesacht stede, vast, unvorbroken to holden sunder jenige argelist. Tho urkunde der wairheit hebben wy unsze conventes zegell witlichen an desen brieff gehangen. Amm negesten saterdage na Petri ad vincula, anno Domini millesimo quadringentesimo nonagesimo sexto.
x
| Edities |
E. Friedländer, Ostfriesisches Urkundenbuch II (Emden 1881), nr. 1500 |
