| Nummer:oub1498 | Datum:19. Juli 1496 | Overlevering:Editie | Vindplaats:Ostfriesisches Urkundenbuch, II, S. 506, nr. 1498 |
Der Pfarrer zu Gross-Faldern u. s. w. Boyo Meyens bekundet, dass schiffer Bette zu Emden sammt seiner Frau und seinem Sohne dem Bolardus von Jemgum zu Emden 4 1/2, genau bestimmte Grase Etlandes im Rysumer Hammrich verkauft haben.
Ick Boye Meyens, decretorum doctor, kercher to groete Phalleren unde vicarius perpetuus der kercken to Emeden, enkenne unde betuge apenbar vormits dussen mynen apen bezeghelden breve vor alsswem, dat vor mij synt ghekomen de bescheden scypper Bette, borger in Emeden, Hysse, syne elyke husfrouwe, unde Haye Bennena, Hyssen vorscreven echte soen, unde bekanden vor syck unde oere erven tosampt eyndrachtigen, dat ze myt vryen willen, walbedachtes modes, hadden vorkofft unde noch jeghenwordych in macht s breves vorcofften stedes vasten koepes vyfftehalff gras etlandes in Rysummer hamrick, beleghen in ener fenne van neghen grase, tusken twe fennen, ghenomed[*] de eyne de Uthedafen, de andere de Thymghafen, dem besceden Boelhardo van Jemghum, borgher in Emeden, Elzeken, syner eliker husfrouwen, unde orer beyder erven, vor eyne tsumme van ghelde, dewelcke Betthe, Hysse syn husfrouwe unde Hayo vorbenomed bekanden, em de eerste penningk mittem laetesten van den uppghenomeden Boelhardo to wyllen unde vullen ghenoghe wal untrycht unde betaelt were, des ze em bedanckden, unde loveden eme unde synen erven dusses vorghescreven land des guede warscupps to doen vor syck unde oren erven vor alle ansprake gheestlikes offte warltlikes rechtes, wanner unde vaken Boelhardo unde der ghenanten syner husfrouwen offte orer twyer erven des van noeden to doene mochte werden sunder alle argelyst. Hyr an, by unde over synt ghewesen de beschedene Berndt Kremer unde Bernhardus, scryver, borghers in Emeden, alssoe tuchslude gheropen unde ghebeden. Toe groeter unde merer bevestnysse des warheyts zoe heb ick mester Boye Meyens vorbenomed myn inghezeghel umme vruntliker bede wyllen Betthen, Hyssen unde Hayen vorghescreven wytliken beneden tho dussen breff ghehanghen. Geven nae der gheboert unses Heren Christi dusent veerhundert sees untneghentych, amm neghesten dingstedaghe nae Margarete virginis et martiris.
