| Nummer:oub1491 | Datum:Emden, 27. Mai 1496 | Overlevering:Editie | Vindplaats:Ostfriesisches Urkundenbuch, II, S. 501, nr. 1491 |
Der Landrichter Johannes Huesman bekundet, dass der Emder Rathsherr Bolard von Jemgum mit der Frau Geseke von Sögel, seiner früheren jetzt an Dirk Kremerssen wiedervermählten Schwiegertochter, über den Nachlass seines Sohnes, namentlich das jetzt von dem Ehepaare bewohnte Haus, eine Uebereinkunft getroffen haben.
Ick Johannes Huesman, lanndtrechter der gravesscapp Oestvreslandt, bekenne unnde betuge mijt dessenn mynen openen besegelden breve voer alsweme, dat voer mij inn gerichte is gekomen de ersame Bolardus van Jemmingen, mederaetman der stadt Emeden, vann der enen sijt, unnde Gheseke vann Soegell, wandages seligenn Henricks, Bolardus soens, huesfrouwe, itzundes Dyrck Kremerssen huesfrouwe, van der anderen sijt, unnde bekannden, dat se sich leeflikenn unnde vruntlikenn hebben vorgaen entlikenn unde ewichlikenn geschedenn aller reppliker guedere wegen synes soens kyndere wegen, soe dat de ene toe den anderen nyne toesaghe en hadde, unnde bedanckedenn den anderen aller vruntscapp unde gueder untrichtinge. Forder sodane hues, soo Dyrck unnde Gheseke itzundes bewonenn, dat belegenn is tusschen hueserenn Wolter Eyskennss upp de noerdersijt unde Witte Ubbenn hues up der sudersijt, dat soelenn se toe ewigenn tydenn hebben unnde beholden; dat hues staende achter Bolardus hues tusschen Haro Wynekenn unnde Lubbert Groenen hues, mijt den beten werve, all wanndt upp den Delff, dat soelenn seligenn Henricks kyndere unde Gheseken kyndere beholden ewelick unnde erfflick, mijt sodanen underschede, off seligen Henricks kynder alle vier, dat God verbede, vorstorvenn sunder lyveserven, soe sall Gheseke dat vorscr. hues wedder hebben mijt dem halven gange, de upp denn Dellff gheyt myt denn warve, daer dat hues uppe steyt, unnde dess sal men dan de koekene achter Bolardus hues wedder affbrekenn, unnde dan, wanneer de koekene so affgebrokenn is, dat ruum dan tusschen Bolardus unnde Gheseken hues, soelenn se beydenthalve toe beydenn hueseren toesamende bruk.enn. Oeck off seligenn Henricks soens alle dre vorstorven sunder lyveservenn, unnde dat meken, dat toe kloester is, levendich bleve inn den kloester, so sall nochtant Gheseke dat vorscr. hues hebbenn, ewelick unnde erfflick beholden, unde dat kyndt sall van denn huse nicht hebbenn, soe ferne dat in den kloester bleve. Dedingeslude desser vorscr. vruntscapp synnen gewesen de ersamen Johan Tynnsken unnde Henrich Kremer, borgers toe Emeden. Tee forder erkantnisse der waerheit hebbe ick myn segell ann dessenn breve ghehanngen. Ghescreven toe Emeden, in deme jaer unnses Heren dusent vierhundert sess entnegentich, dess negesten frydages na Pinxten.
