| Nummer:oub1468 | Datum:26. Nov. 1495 | Overlevering:Editie | Vindplaats:Ostfriesisches Urkundenbuch, II, S. 478, nr. 1468 |
Die Bürgermeister von Meppen bekunden ebenfalls den Vorbehalt, die nicht vollwichtigen Friesischen Gulden gegen gute Rheinische Gulden umzutauschen, unter Mittheilung der näheren Bedingungen.
Wy Hinrick Blancke, Albert tor Bruggen, Borchart tor Bruggen und Roleff Keveler, burgemester in der tyt to Meppen, bekennen und betuygen openbair in dussen breve, dat vor uns gekomen syn die erberen und ersamen Hero Maurisses van Dornum, mester Diderick Valcke und Sybo Hoytken, vaget upn Orde, [*] bekanden openbaer vur uns, als volmechtigen der edelen heren Edezartz, graven to Oestvreslant, und syns broders juncker Uken, erer heren unde junckeren, so als de hogeboren furste, unse gnedige lieve here van Munster etc., eyne recognicie versiegelen hefft doen, vermeldende, syne gnade van den vurscr. heren Edezarde unde synen broder juncker Uken theyndusent golden Rynsche gulden entfangen solle hebben, welckerer gulden men up sunte Mertyn nestvergangen viffdusent solde betailt hebben, und die anderen viffdusent boren sall up sunte Mertyn darnestkomene, na lude des scholtbreves darvan sprecken, als men schryvet sees und negentich, und hude up dach datum dusses breves die irsten verschreven viffdusent gulden betailt syn, und als dat dan vaste alle Vresche gulden syn, und oick ere gewychte nycht all en hebben, und dat verdrach holt up gude sware volwychtyge goldene Rynsche gulden, daruit die geschickden rede unde frunde unses gnedigen lieven heren van Munster vurscr. myshagen und nyn guet benogen en hadden an den gulden, und sick beduncken lieten, die gulden nycht guet und swaer genoich solden wesen gelyk anderen guden swaren golden Rynschen guldenen, hebben die vilgenanten Hero Maurisses, mester Diderick und Sybo vurscr. van wegen und volmechtich erer heren und junckeren vurscr. gelofft und gesettet: wert saicke unse gnedige lieve here van Munster vurscr. der gulden so vurgerort all off eyn deill nicht en konde bestadert in affloyze siner gnaden verpandynge darmede doende und die gulden vorg. gewraket werden in gelde off gewychte, die gulden to wandelen off to vergueden mit gueden waren goldenen Rynschen gulden, darmede unse gnedige lieve here van Munster versatte pantschap sonder argelist wedder Iozen moge, und dat to doende unde to vollentheyne bynnen Meppen des donnerdags na sunte Pauli primi heremiten dage schirstkomene, und die gewrackeden gulden wedder to sick nemen sullen und unsem gnedigen heren dan vort darvur und in die steede van stonnt und up densulfften dach ander gude sware volwichtige golden gulden wedder geven und betalen sollen, dat reede unses gnedigen heren vurscr. den erberen mester Hicken, praveste to Emeden, eder Hero Maurisses, gebroder van Dornum, den beyden edder erer eyn, under dusser tyt vurscr. den taill der gewrackeden gulden willen schryven doen bynnen de stadt Emeden, und offt de vurscr. her Edezart und syn broder up der vurscr. tyt in die stadt Meppen nycht en schickeden und sodaen wandelynge nycht en deden, so sall und mach unse gnedige lieve here van Munster. vurscr sick holden na lude und inholde syner gnaden siegell und breve in maitten und gelyk synen genaden nicht betailt en weren. Dyt so vurscr. steht hebben die vilgenanten Hero, Diderick und Sybo vor uns burgemesteren vurscr. van wegen der greven, erer heren und junckeren vurscr., gelovet, geseckert und verwilkort in guden truwen stede und vast t halden und to vollentheynde sonder argelist. Und des to urkunde, so heben wy Hinrick Blancke, Albert tor Bruggen, Borchardt tor Bruggen und Roleff Kevele, burgemester der stat to Meppen vurscr., unser stat siegell umb bede willen der vilgemelten Heren, mester Didericks und Syben umb gebreck willen erer siegels, see nicht by sick en hedden, onden an dussen breff gehangen. Hier weren an und over to tuge gebeden die erbern Dideke Schaden und Diderick van Erwytte. In den jaren unses Heren dusent veerhondert vif und negentieh, des donnerdags na sunte Katherynen dage.
