| Nummer:oub1456 | Datum:14. Sept. 1495 | Overlevering:Editie | Vindplaats:Ostfriesisches Urkundenbuch, II, S. 468, nr. 1456 |
Junker Edo Wiemken schreibt an den Grafen Edzard wegen der Gefangenen von der Schortenser Kirche.
Eddele unde wollgeboren besunder guede frundt. Ich hebbe na lade myner vorscriffte de gefangen wedder vor my gehat; so hebben se vier prester tor stede gebracht, alse namptlick de kerckher to Scortensen, her Frederick unde her Lubbe vicarii darsulvest, unde eyn junck prester, her Frederick genant unde iss diaconus, de dat samptlicken by erer presterscup unde by erer selen salicheyt unde by der hilligen missen, se de dree prestere dessulfften dages celebreret hadden, noch hebben bekant, dat Otto Papen, Ludeke unde Hayo van Munster den Scortenser so togesecht unde gelovet hebben, de up der kercken weren, so ick juwen eddelheyden nuw unlange vorhen hebbe doen scryven, also dat se scolden up eren vrygen voten, ungefangen, ungestocket unde ungeblocket by eren husen unde guderen hebben gebleven, unde so Otto Papen myt den anderen juw eddelheyt deynren, des nicht bestaen en scolen, so my juwe eddelheyde am nylichsten deden wedderscryven, so is myn frundtlike begere, ensodant tor tyt willen berouwen unde gutlicken anstaen laten unde to irkantnisse komen to latende; is denn juwer eddelheyt amptman unde deyner vorg. des vor den presteren tho tho belovende, billicken de gefangen denn inholden, unde will my daranne hebben, juwe eddelheyde my myt beschede nyne schuldt wyten en scolen; weren ock averst juwe eddelheyde besynnet, my eynen enckeden dach up belechlyke stede uth tho stickende, dair men de prestere unde juwer eddelheyt deyner ergenant so reden unde sproke tho hope brachte, dar denn van beydenthalven by to schickende rede unde wedderrede behoren to latende, unde dar denne na so deme rechte negest weere, voert tho varende, scolde my ensodans ock woll beleven; unde vormeyne ich hyranne billicken jo vull tho bedende, unde de anderen gefangen de vorborget synt edder den dach gegeven is, scolen holden edder eere borgen gutlicken benemen, edder ick will de borgen an eere huse unde guedere wysen beth so lange se van den gefangen benomen synt, unde iss van des dincktales wegen myn frundtlike beger, juwe eddelheyde eynen juwer deyner eynes hilligen dages hijr wolden tor stede schicken, dat men de lude konne by en anderen krigen, we denne dejenne synt, de juwen eddelheyden van rechte dincktael schulde syndt, scolen van juwen eddelheyden gutlicken na rade van juw scheden. Wes dusses juwe eddelheyde besynnet synt, begere ich juwe gutlicke andtworde by dussem jegenwordigen scrifftlicken wedderumme. Gode bevolen. Screven ame maendage exaltacionis sancte Crucis, anno XCo quinto.
Ingelechte cedele.
Ock sy dar noch en prester, her Helmerick genant, her Eylde kappellaen, de itsunder nicht by der hant en is, mede an unde over gewesen, do Otto Papen den Schortenser so bovengeschr. lovede unde togesedt, ich juwen liefften sust int gutlike voert vorwitlicke.
Ingelechte cedele.
Ock sy dar noch en prester, her Helmerick genant, her Eylde kappellaen, de itsunder nicht by der hant en is, mede an unde over gewesen, do Otto Papen den Schortenser so bovengeschr. lovede unde togesedt, ich juwen liefften sust int gutlike voert vorwitlicke.
