| Nummer:oub1442 | Datum:27. Juni 1495 | Overlevering:Editie | Vindplaats:Ostfriesisches Urkundenbuch, II, S. 453, nr. 1442 |
Eine Reihe Kirchspiele in Wangerland huldigt den Grafen Edzard und Uko, und verpflichtet sich unter Stellung von Bürgen, binnen 14 Tagen 2000 Rheinische Gulden als Handgeld zu zahlen.
Wy gemene kaspelude to Hoekercken, Wadtwerden, Tettense, Pakense, Mynze, Wieharden, Oldorp, Wippense, Westrum unde Mherense[*] und lantsaten in Wangerlant bekennen und betugen mit dessen unsen apenen besegelden breve, dat wy sampt mit guden willen und wolbedachten mode hebben gelavet und lifflick thon hilligen geswaren, loven und sweren in krafft unde macht dusses breves den eddelen und wolgebornen graven Edtzarde und Uke gebrodere, graven tho Oestfreslant, unsen gnedigen leven heren, eren erven, anerven unde nakamelingen to ewigen tiden, getruw und holt tho sin, or beste tho weten und argeste tho keren, furder alles doen, dat ore gnaden van uns begeren tho doen; furder willen wy siner gnaden vornogen und guedtlick betalen binnen dessen verthein dagen negest anstaende ane jenige lenger vorstreckinge twedusent gulden Rinsch vor hantgelt, dat sin gnaden uns vor undersaten hefft entfangen, und hebben derthalven densulven graven, unsen gnedigen leven heren, vor sodane gelt binnen der genoempten tidt to betalen gude frome lude uth unsern kerspell tho borgen gesatt, und to furder orkunde unse segele up dessen breff heten drucken. Saterdage nach Johannis Baptiste, anno XCo quinto.
