| Nummer:oub1406 | Datum:18. Aug. 1494 | Overlevering:Editie | Vindplaats:Ostfriesisches Urkundenbuch, II, S. 422, nr. 1406 |
Abrechnung der Emder Bürgermeister über die Deichgelder.
Ame maendage na assumptionis Marie virginis, anno nonagesimo quarto, in bywesen des werdigen hoichgelerten erbaren unde duchtigen mester Hicken, doctoir, provest to Emeden, tho Dornhum unde Witmunda, Eyleken unde Garliche, gebrodere, to Uphuesen hovetlinge, unde Johannse Huesman, landtrichter der graveschup Oestvrieslandt, hebben de ersamen borgemeistere als Nomo, Hompo, Berndt van Dueten unde Ghert van Gelleren der stadt Emeden der dyke wegen guede rekenschup gedaen van upgeboirden unde uitgegeven gelde, also dat se schuldich bleven, dat se meer hadden upgeboirt dan uitgegeven, hundert zware golden unde vierteyn, van welcker summe geldes den voirgenompten borgemeisteren worden qwijtgegeven unde vurlaten negen unde twyntich zware gulden, dairumme dat se dat golt hoiger hadden upgeboirt, dann se wedder uit konden geven, unde vyff unde dertich zware gulden voir kost unde teringe, de se by den dijken unde sus wanner dat gelt gebracht wordt gedaen hadden, also das se noch schuldich bleven der gemeynte vyfftich zware gulden. Hijr weren ouck mede by de ersamen Haro Wynneken amptman, Lambert van Lynghen, Hilmer Zyben, Clawes Goltsmidt, Coerdt Kremer, Remet Ubben, unde Uffe van Jeenlet, radesheren tho Emeden.
Nicolaus de Bingum, scryver to Auwerick.
Nicolaus de Bingum, scryver to Auwerick.
