| Nummer:oub1399 | Datum:Esens, 17. Juli 1494 | Overlevering:Editie | Vindplaats:Ostfriesisches Urkundenbuch, II, S. 418, nr. 1399 |
Ritter Hero von Dornum bittet den Bischof von Münster, da die vereinbarte mündliche Besprechung resultatlos verlaufen sei, um Nachricht, nach der er sich in den drohenden Zeiten richten könne.
Post servicium. Erwerdige in Godt vader, hochgeboren furste, gnediger leve here. So juwer gnade an mynen leven swager unde my juwer schrifte lethen gelangen, inhaldende de handell unde degedinge twischen den drepliken juwer gnaden rederen eynes, unde unns nabure myner ohme des anderen deles, eynn unvruchtbare avescheide hadde gewunnen, uns warschuwende to denn unsenn myt guder vorsenicheidt gereke unde acht to hebbende, juwer gnade gedechte sik in kordt in enen ordt juwes landes to benalende edder drepliche juwer gnaden reder to schickende unde uns aldair to verschrivende umme to verwitlikende, wo wy by den dingen forder scholden waren etc., so juwer gnaden schrifte dat breder vermelden, deme doch went herto so nicht is gescheen, welk denn myne leven swager unde my na gewandten saken neyn kleyne vorlangendt orsakedt; in unnse andechtige flitige bede unde beger, juwer gnaden sunder lenger vortoch myt den ersten, angesehn unse nabers, myne ohme, mergkliken toreden unde sik myt allem geverde to kriges behoff besorgen, uns willen lathen wethen, wor wy uns na mogen hebben to richtende, darto vorlathe wij uns so allerdinge unde synn willich to vordenende umme juwer gnaden, de wy Gode almechtigh in geluckseliger wolvardt to entholdende bevalen. Datum Ezenzee, ilich, ame donnerdage na divisionis apostolorum, under mynem ingesegel, anno etc. XCIIIIo
Hero van Dornum ritter, to Ezenzee, Stedestorpp unde Withmunde etc. hert.
Hero van Dornum ritter, to Ezenzee, Stedestorpp unde Withmunde etc. hert.
