| Nummer:oub1365 | Datum:24. Juli 1493 | Overlevering:Editie | Vindplaats:Ostfriesisches Urkundenbuch, II, S. 392, nr. 1365 |
Der Bürger Heinrich Kremer zu Emden verkauft dem Bürger Bolardus daselbst 13 1/2 näher bezeichnete Grase Landes.
Ick Hinrick Kremer, borgher in Emden, enkenne unde betughe openbaer voer allessweme in dessen openen beseghelden breve, dat ick myt vryen willen unde walberadens modes, myt willen unde vulbord Aelheyt, myner echten huusfrouwen, hebbe rechtes kopes vorkofft yeghenwoerdich in kracht unde macht desses breves, deme beschedene manne Bolardus, borgher in Emden, unde Elzeken syner echten huusfrouwen, unde oren erven holder desses breves mit rechte alzodane land, als ich Hinrick Kremer unde Aelheyt vorghenant van Loetken van Borsum, nu ter tyt wonachtich ten Damme, ghekofft hebben na uthwysynghe der beseghelden breve, veerteyndehalff gras landes yn twen stucken, soven grase etlandes in Hamhuser harnrick beleghen, daer her Hinrick Kumpenye land by hefft ligghen upt oesten unde Gheerd van Ghelren upt westen unde Loetke een stucke landes upt zuden unde up noerden een meen wech; de sovendehalff gras oec beleghen yn Hamhuser hamrick, daer Johan Roleves by landet in upt oesten unde her Hinrick Kumpenye upt zuden, salighen Albert Tytken kynderen upt westen unde Gheert van Ghelren unde Hinrick vorghenant up de anderen syden, unde dat voer eile summa gheldes, de my Hinrick van den vorbenanten Bolardus degher unde al to mynen willen is betaelt unde vornoghet de eerste pennynck myt deme laetsten, dat ick eme hoechliken bedancke, love unde guetsegghe ick Hinrick vorghenant voer my unde alle myne erven, boren eder ungheboren, deme vorbenanten Bolardus unde synen rechten erven, boren eder ungheboren, alsodane veerteyndehalff gras landes voergheroert vry unde quijt, ledich unde los to waren voer alle ansprake gheestlikes unde werltlikes rechtes; weert zake, dat Bolardus vorbenant offte syne erven yenich schade, hynder offte vordreet anvylle van dessen vorbenanten landes weghen, scal unde wil ick Hinrick vorbenant unde myne erven na my vul ende al guetliken belegghen unde vorghelden sunder arghelist, alle valscheit butenbescheyden. Hijr synt to gheeysschet unde mede by ghebeden voer waerachtighe tugheslude, alse Coerd Kremer unde Arend Scroder, borghers in Emden. In orkunde merer ghetuechnysse der waerheyt so heb ick Hinriek Kremer vorghenant vruntlike ghebeden den ersamen unde vorsichtighen meyster Herman Wessels, prebendaet der kercken in Emden unde van bevele des weerdighen officiaels van Vreeslande commissarius daersulvest, dessen breeff voer my to beseghelen; deme ich meyster Herman erghenant umme Hinricks vruntliker bede willen hebbe mijn seghel witliken beneden an dessen breeff doen hanghen. Int jaer uns Heren dusent veerhundert dre ende tneghentich, up sunte Jacobs avent des hilghen apostels.
