| Nummer:oub1353 | Datum:18. April 1493 | Overlevering:Editie | Vindplaats:Ostfriesisches Urkundenbuch, II, S. 381, nr. 1353 |
Auf dem Tage zu Aschendorf wird der zu Hampoel verabredete Waffenstillstand zwischen dem Bischofs von Münster und den Grafen von Ostfriesland verlängert und es werden neue Bestimmungen über die Gefangenen u. a. m. getroffen.
Tho wettene, als der gebrecke halven tusschen den erwerdigen hochgebornen fursten unde heren, heren Hinrich, bisscop to Munster unde administrator der hilgen kercken to Bremen, an eyne, unde den edelen junckeren Etzardt unde Uken, gebroderen, greven in Oestvreschlandt, an de anderen zyden, entstanden unde erresen, dorch geschickede frunde capittels unde stades Munster myt todayt des werdigen heren Diderikes van Rijswick; doctoris unde pravestes to Cleve unde Husum, up dach datum desser nottulen bynnen Asschendorpe eyn dach verramet unde bestemmet, [*] unde dorch geschickede rede unde frunde van beyden zyden gehalden ys, dar dan under mannichfoldigen redden unde wedderreden sich aldar begeven, dorch capittels unde stades Munster geschickede vurscr., als myddelers unde dedingeslude, gehandelt unde bededinget ys, dat sodaene bestant na deme avescheyde des dages lestverleden an deme Hempoele derwegen gehalden, van beyden parthen vurscr. angenomen unde bewilliget, durene bess deme achteden dach des hilligen Pinxster dages nestkomene, [*] verstecket zijn unde vorder duren sall bess to sunte Jacobi apostoli dage nestvolgene, [*] unde densulfften dach heell uth, vor lande, lude, undersaten, holperen, holpersholperen, anhangeren, togedanen unde bewanten, in aller mathen unde maneren de nottule des dinxedages na unser leven Frouwen conceptionis dage nestvorgangen[*] an den Hempole darvan begrepen inneholdene unde vermeldene ys, doch myt sulcken vorwarden unde bescheyde, dat capittell unde stadt Munster vurscr. dersulfften gebrecke wegene hijr under unsen gnedigen leven heren van Munster unde Bremen unde den ergenanten greven eynen dach wittigen sollen, achte dage vor offte na sunte Johannis nativitatis dage nestkomene, [*] bynnen den dorppe to Asschendorppe vurscr. gehalden sall werden, umme vorderen flyt unde arbeyt daranne to kerene, off de vorgemelten gebrecke in guetlicheit eder na geboer hengelaeht unde verliket mochten werden, unde eck tnede oversproken unde bekallet ys, dat sodane gelt Wilhelme van den Bussche vor eynen vangenen, he to Delmenhorst gefencklick sittene gehat hefft, eme gelove vor gestalt ys, sunder uthforderinge der maninge bestaen blyven sall, so lange dijtselffte bestant bess to zunte Jacobi dage zo vorgerort durende ys, unde de borgen vor de vangene in unses gnedigen heren van Munster etc. hachten gefencklick seeten geloven gestalt hebn, sollen nu upt nygge deshalven vor alle vangene loffte doen unde segele unde breve na vermogen der ersten darup gegeven vernyggen, de dyt bestant uth duren sollen; als ock noch twe vangene tome Nyenhues gefencklick enthalden synt, so hefft mester Hycke, pravest to Emeden, vor sess goldene goldene derwegene geloven gedaen, unde vor der eynen vanckguldene unde sluetguldene mede to betalene eder de beyde tor sulfften vencknysse wedder levendich offte doet to brengene unde leverene; sodan oek bynnen den ersten bestande vorgerort unsen gnedigen leven heren van Munster etc. undersaten myt mortbrande beschediget synt, den ock vedebreve gesant, perde genomen unde affhendieh gemaket synt, unde ock gelt affgeschattet ys, sollen de ergenante greven darna erfaren doen unde deghenne, sulcker daet unde handels schuldich gefunden werden, unvertochlick to rechte stellen, de beschedigeden an eren guden deshalven verhalinge erlangen mogen, unde off se des nicht an den gude hadn, sullen se myt deme lyve boeten, dat men myt vedebreven eder anders bewisen sall mogen, unde hyrinne ys eyn genant Spikerman, mede in der vurscr. nottelen begrepen, uthgescheden; dyt allet sonder argelist, stede, vast unde unverbroken to holdene. Unde in orkunde synt hyrup twe nottulen gelikes inholdes gemaket, dorch de letteren A B C D uth eynanderen gesneden, der eyn vor unsen gnedigen leven heren van Munster etc. beholden, unde de ander vor den ergenanten greven avergegeven ys. Gededinget unde gegeven ime jare unses Heren dusent veerhundert dre unde negentich, des dunrdages na deme sundage Quasimodogeniti.
