| Nummer:oub1329 | Datum:9. Aug. 1492 | Overlevering:Editie | Vindplaats:Ostfriesisches Urkundenbuch, II, S. 362, nr. 1329 |
Geseke Horneman zu Emden verkauft mit Zustimmung ihrer Söhne und ihres Schwagers aus ihrem Hause in der Langenstrasse zu Emden für 60 darauf erhaltene goldene Rheinische Gulden Kapital 3½ Rheinische Gulden Rente an ihren Schwiegersohn Bernd Kremer und dessen Frau Swaneke.
Ik Ghezeke Hoernemans, Johan Hoernemans mylder ghedachtenysse nalatene huesfrowe, in Emeden wonafftich, bekenne in dyssen apenen beseghelden breve, dat ick myt guden, vryen wyllen, walberadenen moede unde myt vulboert myner kyndere, als Claeses, Tytkens unde ock Hinrik Kremers, mijnes swagers, hebbe vorkofft unde vorkope jeghenweerdich in crafft dysser scryfft deme ersamen manne Beernd Kremer, unde Swaneken, zijner echten husfrouwen, ock mijner dochter, veerdenhalven enckelden golden Rynsen golden jaerlyker renthe ute unde van mijnen huse unde boeden, zo ick dat bewoene, beleghen in Emeden, in der langhen strate an der noerder zijden, twysschen huseren olde Werneken Scroders unde Evert Kakes, daer ick to mijner vuller noeghe voer hebbe entfanghen tzestich enckelde golden Rynse gulden; lave unde ghuetsegghe ick Gheseke vorben. vor mij unde vor mijne erven elkes yares eens up sunte Laurencius avent alzodane veerdenhalven enekelden golden Rynsen gulden deme benomeden Beernde unde Swaneken, zijner echten husfrouwen, unde eren rechten erven wal to betalen, myt vorwoerden, dat ick Ghezeke vorben. unde mijne erven unde anervent moghen elkes jares up sunte Laurencius avent myt tzestich enckelde golden Rynsen gulden desse veerdehalven golden Rynsen gulden renthe weder vryg unde qwijt kopen, so veer als de vorsetene renthe zij betalt, zunder alle bedreechnisse. Hijr hebben by, an unde over wezen de beschedene manne Arent Scroder unde Gheert Goltsmit, borgers in Emeden, hijrto ropen unde beden. In orkunde der waerheyt so hebbe ick Ghezeke Hornemans vorscr. beeden den ersamen man heren Johanne Voerman, in der kerken Emeden altaristen, umme zijn inghesegel, dat he umme mijner beede wyllen hefft doen hangen to dyssen breve. In den jaere unses Heren dusent veerhundert twee ende tneghentich, des avendes Laurencii martiris.
