Schutz- und Trutzbündniss der Grafen von Ostfriesland und von Oldenburg wider den Bischof Heinrich von Münster.
In den namenn Godes. Amen. Ume raste, vrede, eindracht der lande unde lude, ok sunderliger frunschup willen, is twischen den edellen unde wolgeborenn junchernn, juncheren Johanne to Oldenborch unde Delmenhorst ann eyner, unde heren Edzarde, to Ostvreislanden greven, anne andere siden, vor sick ok vor de edellen unde wolgeboren ere bisunderen fruntligen leven broideren, juncheren Alffe to Oldenborch unde Delmenhorst, unde juncheren Uken, to Ostvreislanden greven, vulrnechtich vorhandelt, vorramet, gedegedinget unde gensligen na disser nabeschreven wise vaste besloten, so dat ume vele bewisedes dranges, schaden unde wederwillen beidenthalven van deme ernwirdigenn in God vadere heren Hinricke, bisschuppe to Munstere etc., geschein is, dagehkes vorholt vurdere bewisen unde ankeren mochte uns sampt oft eynen parth besunderen, uppethoholden unde vorwerende unsen landen, luden to nutthe unde fromen, uns fruntligen up hute mandach na Kiliani martiris to Detherden voreiniget, vordragen unde vorplichtet, ok mit handgeloften upt hoigeste bevestiget, oft de gedachte bisschup uns samptligen edder eynen bisunderen to beschedigende vornehme, ofte jemant anders mit eddere sunder ene, dewile wy in dusser vruntligen vorstrickunge sind, unde dar unser eyn den anderen int erste to eren unde rechte irboide behalven den bisschup vorgeschreven vorschriven unde ok mechtich wesen schall na data dusses breves, so dat deme jo nicht batlick sin mochte, unde darboven unse lande, lude, slote efte veste belehde, insoichte, overfelle, edder anderen unwillen ane veiden ofte schaden deden, denne willen wy unde schullen van stand dessulven bisschuppes unde alle derjennen, de sinen gnaden jegen uns in siner hulpe edder dar buthen sind, alze vorgeroret is, volge, todath efte jennigerleie wie vorderinge deden, vigent werden unde vigentliken doin, vord unse undersaten up- beiden unde unser eyn dem anderen sine lande unde lude entsetten, reddende unde na alle unsem vormoge vlitige hulpe to doinde; forder oft unser eyner van uns vorben. sunderge schelinge edder tosage nach der vordath to deme genanten bisschupe hedden, dessen nichtdemyne uns vorplichten, des degere unde gans by eynen tho bliven, alsse dat oh allreide was latest to Minden dorch de ernwirdigen, irluchtigen, edellen unde wolgebornen heren, fursten, graven unde juncheren ame mandage na Cantate negest vorscheinen[*] besloten unde to holdende gelevet ward, unde nu sunderges vorniget; ok schall unde wil unser eyn buthen des anderen wete, willen unde fulbort mit deme genanten bisschup to Munstere ofte sinen hulperen nicht handellen, sonen noch sich verdragen; ok oft wy winste edder bate, wur wy de unse samptligen hedden, vorworven efte kregen, willen unde schullen wy uns na twier van beiden parthen der unsen irkantnisse des gutligen under anderen vorliken. Lehnde averst unser eyner dem anderen ruthere edder lude to voithe unde to perde, wes nuthe edder vordeill darmede worde vorworven, schal bliven unde sin demjennen se gelehnet sindt; unde oft schade, hinder edder jenich gebreck darane velle unde qweme, schollen unde willene eyne ider parth den sinen hebben unde stan; ok oft clockenslach edder eyne gemeyne ruchte worde, denne schall unde wil unser eyner mit der macht deme anderen uppe de jacht to troste, hulpe unde tom besten komen; oft in der jacht God almechtich winste unde vordell gevene, denne sollich winste thosamende nethende unde to hebben; ok schulen unde willen wy unser eyn des anderen frommen unde beste raden unde vorwitligen, schaden, hinder unde arch warnen unde na allem vormoge afwenden. Dusser vorbunt unde vorplichtinge, alze vorgeschreven steid, loven unde sweren wy Edzardt unde Uke gebroidere, grevene vorbenompt, Aleffe unde Johanne, ok gebroideren unde greven eirgedacht, mit uthgestreckedenn unde upgelechten fingeren dusses breves stavedes eides to den hilgen stede unde vast sunder jeningerleie argelist, hulperede noch intoch gansligen to holdene; welkes vorbundes unde vorplichtinge, so vorgeroret is, twe breve gemaket sind, allike eynes ludende, de eynen parth deme anderen vorsegelt; so hebben wy Edzardt unde Uke, gebrodere unde greven vakengenomet, unsse rechte ingesegelle witligenn an dussen breif heten hangen, de gegeven, vorsegelt, gansligen besloten unde vultogen is ame avende Jacobi apostoli, na Cristi unsers leven Heren gebort veirtheinhundert, ime twe unde negentigesten jaren.
x
| Edities |
E. Friedländer, Ostfriesisches Urkundenbuch II (Emden 1881), nr. 1327 |
