| Nummer:oub1316 | Datum:21. April 1492 | Overlevering:Editie | Vindplaats:Ostfriesisches Urkundenbuch, II, S. 351, nr. 1316 |
Der Pfarrer Eward Ennonis zu Südwalde, Testamentsvollstrecker des Sirk Ennena zu Moorhusen, bekundet, dass die von demselben auf Wunsch seiner Mutter dem Kloster Abbingweer letztwillig versprochenen beiden Diemath Meedlandes nunmehr diesem übergeben seien.
Ewardus Ennonis, to Zuthwald cureet, erkenne unde betughe voir alswem, als vor ghestlick unde wertlick, de dussen breeff zeen oft horen lesen, wo dat Sirck Ennena, een kerspelman to Zuthwalt, wonachtich to Moerhusen, hefft bevalen yn dat laest van zynen leven sunt Johan baptist, to Abingwer patroen, twe demdt meedlandes in de Woldmanne hammerick, geheten yn de komp, van begherte zynes moders, genompt Baw Ennena, do se starff, um zalicheyt zyner und zyner oldere seele salicheyt unde anderleye sake nae bewys offt uthwisinghe zynes testaments van my gemaket, unde nae yn dusser myner scrifft unde ingezeghel betughe unde apenbare nur zyner begherte doe he starff, unde vurder togestaen van den vrunde yn der delinghe nae zyner zeele upp den dartichsten dach; des hefft Hab Upkena, de naest van de vrunden, den convent datsulve land overgedraghen, ghelevert offt togestaen, also dat dyt vorbenompt convent mach dyt vorgescreven land gebruken, vorhuren, vorkoepen, vorwesselen, oer orber, nutticheyt darmede to doen nu unde to allen tiden; alle argelist, nye vunde, hulprede, de dussem bevell offt breve muchte hinderen, uthgesecht. Hyr mede, an unde aver zynt geropen tugeslude de warheyt to spreken, offt des noed und behoeff dede, als bename: Hicko Folckmersna, Bewo Ygena, inwoners to Moerhusen unde Mathias Peter, in Zuthwalt koster, und anders gude lude genuch. To groter standaffticheyt unde sekringhe der warheyt so heb ich Ewardus vorgnant, testamentarius Sircks vakengenompt, um zyn bede myn warafftich ingeseghel hanghen beneden andt spacium dusses breves. Anno Domini 1492, [*] die undecimo kalendas Maii.
