Der Häuptling Iko Onken von Knyphausen bekundet, dass der durch Vermittelung Bremens zwischen ihm und den Kindern Alko's einerseits und den Städten Lübeck und Hamburg andererseits vereinbarte Waffenstillstand noch bis zum 10. Juni 1492 währen soll.
Ick Iko Onneke, to Kripenshee unde Inhusen hovetlingk, bekenne unde betuge openbare in unde myt desseme openen breve vor alsweme, so alse twischen den erliken unde erbarenn steden Lubeke unde Hamborch unde eren bewanten eyns-, ock my unde seligen Alken kynderen unde den unssen anderdeels etlike twyst unde unwylle sinth entstanden, de denne sommyge yare dorch de ersamen unde vorsichtigen unsse frundt, den radt to Bremen, upgenomen unde in eyn gutlick bestandt gebracht unde van tyden to tiden upgenomen, bearbeydet unde vorlenget sin, welck lateste bestandt unde tydt denne expireret unde ummegekamen ys, heben de vormelte ersame raedt to Bremen noch eyn vurder bestandt twisschen uns beyden parten beth to Pinxten erstkamende ghedurende, nomptlick in dat yaer twe unde negentich[*] bearbeidet, sodanne gutlick bestandt ick Iko van wegene myner unde ock seligen Alken kyndere ere deels vor uns unde unsse undersaten, vorwanthen, thostendere unde alle, der wy moghe unde mechtich sin, to water unde to lande myt lyve unde gude seckerlick tho synde, tho wanken, varen ende kerhen, velich, umbehindert wedder unde vorth, heben anghenomen, bewillet unde belevet, so wy dat yegenwardigen annemen, bewyllen unde beleven in crafft desses breves, allet sunder gheverde ande yeningerleye argelist wol to holdenne. In orkunde unde tuchenisse der warheyt, so hebbe ich Iko Onneken, hovetlingk vorbenomet, vor my unde van weghenne seligen Alken kyndere eres deels, ock vor uns unde alle de unsse bovengescrevenn myn rechte ingesegel witliken to dessen breve gehangen. Gegeven unde screven na Christi geburdt unsses Heren dusent verhundert, darna in deme eyn ende negentigesten yare, ame mydwekenn neyst Luce ewangeliste.
x
| Edities |
E. Friedländer, Ostfriesisches Urkundenbuch II (Emden 1881), nr. 1296 |
