Hero von Dornum, Edo Wiemken und lko Onken schliessen mit den Hansestädten Waffenstillstand bis zum nächsten Osterfest (1489).
Wy Hero van Dornum ritther, tho Esense, Stedestorpe unde Witmunde hovetling, Edo Wymeken, Oho Jever, in Oestringhen, Rustringhen unde Wangherlandt hovetling, unde Iko Onneken, tho Knypense hovetling, enkennen unde tughen in unde avermyds dussem apenen beseghelden brieffe vor alsweme, wy den Oesterschen steden, Lubeck, Hamburgh unde Bremen, tho lieffmode unde willen, sodaner twyste halven tuschen uns upgenant, alle uppe eyne, den Gronynger, Detmarschen unde Wurster uppe andere halve, irstanden, sampt unde besunderen hebben benatet unde anghenomen, benaten unde annhemen jeghenwordich in krafft dusses brieffs eyn velich, frundtlich unde vast bestandt tuschen nuw unde Paeschen erstkomende na datum s brieffs, unser eyn deme anderen, noch deme ghemeynen koepman van beydenhalven, beyde tho wathere unde tho lande nicht tho beschedighen edder beschedighen laten sunder jenygherhande argheist, unde denken in der myddeltydt, namptlich dess maendaghes na Johannis tho myddensommher, eyns frundtliken daghes myt den upgenanten steden unde landen bynnen der stadt Bremen tho ghewaerden, in deme se uns eer vorseghelynghe na aldusdanygen uthlude wedderumbe ten handen schicken, dair wy danne dejhenne, wy unse recht unde unrecht an dencken tho stellende, bynnen der upgenanten stadt Bremen willen vorkesen, de unser dan sulffs myt thodaedt unser anderen frundt tho rechte edder frundtscappen beyde tho nemende unde to donde, scholen vullmechtich syn. Dusses tho merer irkantnisse unde bevestynghe der wairheydt, hebben wy Hero van Dornum ritther, Edo Wymeken unde Iko Onneken, hovetlinghe upgenant, itlyck unse rechte inghesegele witlyck beneden upt spacium s brieffs heten drucken. Datum ame sondage vor Georgii martyris, anno etc. LXXXVIIIo.
x
| Edities |
E. Friedländer, Ostfriesisches Urkundenbuch II (Emden 1881), nr. 1221 |
