| Nummer:oub1198 | Datum:29. Okt. 1487 | Overlevering:Editie | Vindplaats:Ostfriesisches Urkundenbuch, II, S. 261, nr. 1198 |
Kreditiv der Stadt Bremen für den Propst Heinrich Boecholt von Bardowik zu einer Mission beim Häuptling Edo Wiemken von Jever in Sachen ihrer Streitigkeiten mit Hero Omken zu Dornum und Ernst von dem Busche.
Wy borgermeistere unde radtmanne der stad Bremen begeren ju, erbare juncher Ede Wymmeken, to Jhever etc. hovetlyng, myt dessem unssem breve negest unssen fruntliken gruth gutliken weten, dat wy an juwe leve schicken dessen jegenwardigen heren, heren Hinrike Boecholte, provest to Bardewyeck, en togere desses breves, unde bidden juwe leve, gij one in sodannen saken, nomptlyken van den schepen unde guderen, de de duchtighe Ernst van dem Busche ute des geduchtigen heren Hero Ommekens to Dornum rytter etc. lande unde wedder in angehalet hefft, alse he nu tor tyd an ju wervende werdt, gutliken horen unde geloven wyllen, gelyck wy personliken myt ju tho muntliker sprake weren. Dat vordenen und vorschulden wy umme juwe leve; de wy Gode deme Heren langhe frolich unde gesund bevelen alle tyd gerne. Des to tughe hebben wy borgermestere unde radtmanne der stad Bremen erbenompt unser stad secretum benedden desse scryfft heten drucken. Na Godes bordt verteynhundert yare, darna in deme seven unde tachtentigesten yare, des mandaghes negest Symonis et Jude apostolorum.
