| Nummer:oub1161 | Datum:5. Febr. 1486 | Overlevering:Editie | Vindplaats:Ostfriesisches Urkundenbuch, II, S. 232, nr. 1161 |
lko Onneken, Häuptling zu Knyphausen und Inhausen, beurkundet die Verlängerung des zwischen ihm und den Städten Lübeck und Hamburg bestehenden, am nächsten ersten Mai ablaufenden Friedens um ein Jahr.
Ick Iko Onneken, to Kerpensen unde Inhusen etc. hovetlingk, bekenne unde betuge opembaer in unde mit crafft dusses breves vor my unde myne erven vor alsweme, so als etlick unwille unde mishegelicheyt twisschen uns unde den ersamen steden Lubeke und Hamburgh etliker mathe entstanden, dat denne sommighe yaer vanne tyden to tyden ghevatet in gude unde fruntliken bestande ghewest is, welck lateste bestandt nu uppe meigdach erstkamende werdt uthgande unde expirerennde, dat denne de ersamen hernn borgermeistere unde radt der stadt Bremen noch to enem jare, nomptlick van meigdaghe erstkamende beth meigdaghe over dat jaer, nomptliken anno etc. sevenundeachtentigh, vorthan eyn seker, vast, velich, unvorbrecklyck, gutlick bestandt bearbeydet, welck bestandt ick unde myne erven belevet hebben unde jegenwardigen beleven in crafft dusses breves, so dat de upgedachten stede Lubeke unde Hamburgh myt alle den eren unde eren tostenderen mit live unde gude der vorberorden schelinge halvene in unsseme lande unde gebede vor uns, de unsse, unde alle, der wy moghe unde mechtich sin to water unde lande frigh, velich, umbeschediget unde umbehindert sekerlick moghen wanken, varen unde keren, wedder unde vorth, allet sunder gheverde unde jenigerleye argelist. In orkunde unde merer sekerheydt hebbe ick Iko Onneken, hovetlingk vorbenompt, vor my unde myne erven, vor alseweme, myn rechte ingesegel witliken nedden an dessen breeff gehangen, de ghegeven unde gescreven is in den jaren unsses Heren dusent verhundert seesundeachtentich, am midwekenn na deme sondaghe Quasimodogeniti.
