| Nummer:oub1120 | Datum:26. Sept. 1483 | Overlevering:Editie | Vindplaats:Ostfriesisches Urkundenbuch, II, S. 196, nr. 1120 |
Testament des früheren Bürgermeisters zu Emden Johann van Winsen.
In nomine Domini. Amen. Ick Johannes Voerman, altarista der kerken Emeden, doe wytlick eyneme jeweliken, deme dysse scryfft wert ghetoent, dat in myner unde der naebescrevene personen jeghenwordicheyt ys ghewezen de ersame man Johan van Wynsen, wandaghes borgermeyster tho Emeden, avertrachtende dyt sterfflike levent unde de ghebrecklicheyt der mensehen, woe dat vele mynschen rokeloeze sterven sunder wijslyke schyckynghe eres testaments; waerumme de eerghenoemde Johan, kranck van lichame, man zund unde walbrukende myt beschedenheyt zyner redelieheyt, wolde zick vorwaren, uppe dat he nycht de schult des dodes betaelde sunder schyckynghe zijnes testamentes yn guederen em van Gaede vorleent. Int eerste dede Johan van Wynsen vorb. bewarynghe, weert saeke, dat dyt testament nycht en mochte macht unde vorvolch hebben van jenygherleyge ankomende hynder unde zake, als men scryfft in den rechte iure testamenti, soe wolde, dat yt allykewol voertganck, steedicheit unde bevestynge scolde beholden dytsulve testament iure codicillorum offte iure donacionis causa mortis offte iure donacionis inter vivos. Soe hefft desulve Johan vorscr. dytsulve testament schicket unde maket in der alderbesten schyckynghe des rechtes wijse, van formen als men een vullekamen testament myt protestacyen, als vorsereven ys, schal schycken unde maken. Daernae als he hadde myt ynnycheyt daer zick to bereth, toe entfaen de sacramente der hilliger kerken, doe bevoel he zijne selen deme almechtigen Gaede, unde den lycham der eerden unde begherde de groeve in de kaspelkerken to Emeden. Doesulves vulboerdede Johan vorser. den breeff, den he unde zijn elike hussfrouwe Hylle gueder ghedechtnysse hadden zametliken belevet, den vort to setten yn allen puncten unde stucken zunder jemandes wederropent. Item doesulves gaff Johan vorser. zijner lever suster Gheseken, Hinrick Mathijs echten hussfrouwen, zijn halve hues, dat he doesulves bewoende, daerto dat veerde part van al den ingoede unde reeschoppe, kleen unde groet, welkeer halve hues vorben. een mytten beroerden reeschoppe schal unde mach Gheseke vorben. vorkopen, vorhuren, vorsetten, vorgheven unde vorterven, weme ze wyl, sunder jemandes straffent; man dat ander veerde part aller ingoedere scholde men keren ter ere Gaeds nae utwijsynghe des vorben. breves. Item doesulves beleveden Hinrick Mathijs unde Gheseke, dat Wolborch, Johansen echte hussfrowe, scholde nae zijner doet hebben de kameren toe eren lijve, daer Halfwassen doe inne woende. Item doesulffs gaff Johan vorscr. Wolborge vorscr. zijner husfrouwen sestich enckede Rynse gulden, daerto eyn guet bedde myt zijn tobehoer. Item weert, dat Wolberge wat overlepe van dyssen 60 Rynsen gulden, als ze de schult des dodes betalt, dat en mach ne nemande erven, man ze schal dat keren ter ere Gades, waer eer guet duncket. Item men scholde boeken enen Rynsen gulden. Item den veer mendicanten elk eynen Rynsen gulden. Item zijnen confessori 4 enkede Rynse gulden. Hijr hebben an unde over wesen de ersamen personen Hinrick Mathijs, Gheseke zijn husfrouwe, Claes Putman unde Wessel Scroder; vorder zijnt hijr vor tugheslude to beden unde ropen Coert baertscherer, Johan Schynkel unde Ladewich Kremer, borgers to Emeden. In orkunde der waerheit soe hebb ich Johannes Voerman voerb. myn eghen inghesegel doen hangen an dyt testament umme beede wyllen desses vorben. Johanne van Wynsen. Anno Domini Mo CCCCo dem entachtentich, up den avent der hilligen marteleere Cosme unde Damiani, patronen der kerken Emeden.
