| Nummer:oub1036 | Datum:12. Sept. 1480 | Overlevering:Editie | Vindplaats:Ostfriesisches Urkundenbuch, II, S. 121, nr. 1036 |
Vertrag zwischen der Gräfin Theda und ihren Söhnen einerseits und Hero Mauritz zu Dornum etc. andererseits wegen Uebergabe der Friedeburg und der Entschädigungen an Hero.
Tho weten, dat up den dingsdag na nativitatis Mariae int jaer unses Heren dusent vierhundert unde tachtentich eine endtlicke saeke undt frundtlike dedinge undt handelinge gescheen undt gemaekt iss tuschen de edele undt wolgebohrne vrouwe Theden, gravinne in Oistfrieslandt, junker Ennen undt sinen broederen van der enen, undt den duchtigen und ehrbaren Hero Mauritzes, tho Dornumb und Fredeborgh hovetling, van der anderen side, mit welke handelinge undt scheidinge alle unwille, twedracht undt scheelinge vorresen van der Fredeborgh und sust von alle andere sahen tuschen beide partheyen, ist guedtliken undt fruntliken vornedert undt grundtlick delegelegt, so dat na dissen dagen deshalven geen unwille entstaen sall noch en moege, in manier hierna beschreven. Int eerste sall de vorbenoemde Hero Mauritz de Fredeborch midt lande undt midt lueden, sande, weide undt wische, so he dat wentherto in besidt gehadt, nu to Paeschen erstkomende overdragen undt in de handt leveren der edelen undt wohlgebohrnen frouwen Theden gravinne, juncker Ennen undt sinen gebroederen graven, voor vyffdusendt golden Rinschen gulden, in welken vyffhundert gulden betaeldt syn, undt dadt nastaende geldt soll ut na tide und stunde, so dat de seheedesluiden hierin beschreven und geteekent dat utseggende werden midt beiden parten de tho besprekende, midt alsodanen underschede, dat desulve Hero Mauritz sall beholden tho sinen besten alle sine arve undt goeder, he dar gekofft in der herlickeit offte anders hefft und eme gegeven sindt, und daertoe hundert demede, liggende in der Westerhammerick, he tho landen hefft gemaeket, dat he uitwisen sall, waneer he de Fredeborch overgifft, daertoe sall de vorbenomede Hero Mauritz holden de veer meyeren, de daer nu tor tydt wonende sindt up den Rispel, de hen geven sullen de tinss von de lande, und den huer todt der Fredeborgh doen, alss guede undersaeten geboerlick is to doen eren heren, undt darsulvest mag Hero Mauritz sine schape holden tho sinen willen. Ock is gededinget undt beschloten, dat de duchtige Hero Mauritz sall beholden dat nu ter tydt up borgh is von bussen, keetelen, potten, und bedden, dadt he mag laeten affordern tho sinen willen, undt sine andere have undt goederen, behalven tein bedden, da de knechte up schlaepen, sullen bliven midt oehrem toebehoor by der borgh. Ock is darna gededinget undt gehandelt, dadt Hicke Boyunck, sine erven, syn broeder undt meister Tjardt undt sust andere, de oer erven undt guederen in der heerlickheidt liggende hebben, de se in besidt hebben offte hen midt rechte tho behooren, unbeschwerdt undt unbehindert sollen brueken, undt de edele vrouwe undt juncker Enne undt sinen broedern densulven tho eren rechten sullen behulplick wesen. Ock is daer bededinget undt belaevedt, dadt de edele undt wahlgeborne frouwe Theda gravinne, junker Enne undt syn gebroeder, graven, sullen Hero Mauritz undt sinen erven quiten de hofstede tho Dornumb midt den steenhuse, vorborch, sette undt koeltuene, so daer ligt, van Aytet tho Hinte, buten sinen schaden, daer de edele undt wahlgeborne vrouwe eme behulplick sall wesen een hues to bouwen midt steenen und anders, so de nabescreven scheedesheren utseggende werden. Ock ist dar gededinget undt geschloten overmids den scheedesheren, dadt de edele undt wahlgebohrne frouwe Theda undt juncker Enne undt sine gebroeder sollen versegeln vor se undt ehren erven de heerlickheidt Dornumb, noemplicken twee kaspelen, alse Dornum undt Redersum, mit eren vorfalle tho ewigen tiden daer nicht bedt up tho spreken. Ock is mede gededinget, dadt Here Mauritz undt Hicke vorbenoemdt oehre erven, undersaten, Hicke Boyuncks und sin erven sollen wesen tollenvry dorch de Vredeborgh uth undt to hues, undt offte se wiedenbusch wolde houwen dorch de Fredeborgh offte daerbi, mogen se doen ohne jemands inseggen sunder tollen undt geldt. Hiermede salll alle unwille, tweedracht undt schelinge tuschen beide parten wesen nedergelegt undt gescheeden tho ewigen tiden. Scheedesheren vorbescreven puncten undt articulen sindt gewesen de ehrbare undt duchtige mester Hicko tho Dornumb hovetling, prouwest tho Embden, Hajo tho Papenborgh, prouwest tho Lehr undt Ubbo tho Uplewardt hovetling, de didt vorschreven in allen gededingedt undt gehandelt hebben, undt von beiden parten vorberoert oek also beleevet is. Dessen tho orkunde sinnen disser sedelen twee, de eene uth den ander schneden dorch den boeckstaven a b c d e, en een jegelick pardt eine sedel tho syck genohmen hebben.
