Der Häuptling Ubbo Tydenna zu Upleward tauscht mit dem Komthur Abbo zu Abbingweer 6 1/2 genau bezeichnete Grase Landes aus.
Wytlich, kundich unde openbaer sy allen goden erbaren luden, beyde gestlick unde werlick, de dussen breeff seen ofte horen lesen, wo dat ick Ubbo Tydenna, tho Plegewert hovetling unde richter in den Ham, myt mynen vordachten synne unde tho herdinge myner moder Etten unde husfrowen Hebberchen, hebbe ghemaket en stede ewich vaste erfwyslinge umme sevendehalf grase landes, keghen den ersamen heren Abben, commelduer to Abbingwer, unde sine conventesvolck, so dat ick em 6 1/2 gras medlandes gheve inna Myddelsummer hammerck, de Reynalt Onnenna to Wyrdum alsus lanck van uns in der hure had heft, unde de commelduer gyft my sevendehalf gras landes wedder. Item de 4 grase liggen myt uns to Plegewert an myner etfennen, unde heft ghegheven broder Poupko sunte Johannse to Abbingwere, als uns witlick is, unde 2 1/2 gras liggen inna provest Ayldes etfenne to Grimesum, welck vorschreven wesselinge ofte bute uns beyden wal even kumpt. Hirumme wil ick Ubbo vorben. mit minen erfnamen, boren oft ungheboren, dusse wesselinge den ersamen commelduer to Abbingwere unde sine conventesvolck stede unde vast holden to ewighen tyden, unde wil em dit vorschreven lant vry unde quijt leveren vor alle ansprake vor allen gherichte, war des noet unde behoeff is, alle argeliste, hulperede, nye vunde buten besloten. Hir by, an unde over dusse wesselinge hebben ghewesen vrome lude als rechte tugeslude, bename Claus van Dutum, Ludeko syn broder, Johan van Linghen, borgers in Emeden. In orkunde unde merer vasticheit dusses heb ick Ubbo hovetling vorben. mynen ingesegel witliken doen hanghen an dussen breff. Int jar unses Heren dusent verhundert unde achte unde seventich, up den hilligen dach sancti Severini arciepiscopi Coloniensis.
x
| Edities |
E. Friedländer, Ostfriesisches Urkundenbuch II (Emden 1881), nr. 1011 |
