| Nummer:oub1006 | Datum:6. Aug. 1478 | Overlevering:Editie | Vindplaats:Ostfriesisches Urkundenbuch, II, S. 98, nr. 1006 |
Graf Gerd von Oldenburg klagt den Häuptlingen von Jever und Esens, dass Hero Mauritz ihm den Quakenbrücker Vertrag nicht halte.
Wy Gherd to Oldenborg unde Delmenhorst greve enbeden juw ersamen Edo Wymmeke, to Jevere, Wangherlande unde Rustringhe, unde Hero Ommeken to Esensen, Witmunde unde
Dornum, hovetlinghen, unsen fruntligen grut tovorne, unde don juw unde alswemme, de unsen dessen breff lesen offte horen lesen, openbare witlich, wo Hero Mauricius uns an der schedinghe unde sone nelkest[*] to Quakenbrugge vorehandelt unde berecesset, [*] alse ame puncte unde articule, dat en jewelk by syneme olden rechticheyden blyven ende beholden schal, dat sy noch gheystlich offte werlich, besperinghe unde hindernisse ghedan hefft unde noch dachlikes deyt, alse benomptliken an Merkesen, Esell und Mehrum, dat he one vorebueth uns nicht to donde, so se unnsen selighen elderen unde vorewesene gedan hebben, dat uns sere voredrotsam unde myshegelik is, so wij deme upgenanten Hero by deme kerckheren to Merckensen ok muntliken baven dren weken to baden hebben, des he uns sundere antworde bet hereto ghebleven laten hefft, unde uns offte de sake lichte so licht voresleyt, so uns gantz entieghen is, so willen wij gerne sulk bestandt twischen uns unde den ghemeynen Vresen holden, ok myt Hero Mauricius gerne ambynnen syn ime he uns neyn wedderstant deyt; (so) mehn dareto Merkensen etc. unde so vorg. is numment wanen offte wesen schal, ane se scholen uns don so billich unde borelik is, offt wij se darumme anlangheden unde unse recht voremanen dachten, juw unde eyneme itliken, de dessen breff lesen offte lesen horen denne desser unser scrifft indechtich wesen will worumme sodant scheghe, ock mochten gij dem vorg. Hero underwisen he de manne underrichten wolde se uns deden, so billich unde borlich is, nemen wij gerne. Screven ame dage Sixti martyris, anno Domini etc. LXXo octavo, under unseme signetum, dat wij wijtliken benedden an dat spacium desses breves don drucken.
