| Nummer:oub0996 | Datum:Upschloot, 24. Okt. 1477 | Overlevering:Editie | Vindplaats:Ostfriesisches Urkundenbuch, II, S. 89, nr. 996 |
Graf Enno von Ostfriesland vereinbart auf einer Tagfahrt mit dem Häuptling Edo Wiemken von Jever eine Reihe von Letzterem zu beobachtender Punkte und verabredet eine weitere Zusammenkunft zu Burmönken unter Angabe der dort zu erledigenden Angelegenheiten.
Toe wetene, dat uppe den vrigtach nae XI dusend megede dach is besproeken, ghedeghedinget unde ghesloeten up ener vruntlichen daghestede by deme Upsloete overmyts den eddelen unde walgebornen juncker Ennen, greven in Oestvrieslande, synen tostenderen, frunden unde reden by der enen, unde den erbern, vromen unde duchtigen juncker Eden Wymmeken, to Jever unde in Wangerlande etc. hovetling, van der anderen sijden, soe dat alle dyngh unde wesend sall vruntlicken unde lefflichen bestaen blyven tuschen en beyden, eren landen unde lueden, de ene den anderen to forderende in allen gueden unde rechtferdicheit, unde soe is mede bedegedinget, dat Tyaerd Onnen mach unde sall nu syne renthe boren unde brueken van sinen erve unde guderen in junckher Eden heerlicheit belegen vrig, velich ende unbehindert, unde juncker Edo unde Tyaerd vorscr. sollen ere schedesluede brengen des maendages nae mydfasten[*] up enen fruntlichen dach toen Buersrnoneken, dair men se danne in rechte offte vruntscappen sall scheden, soe de beiden dat anghenomen ende belevet hebben. Oek soll men danne tor sulven tijd scheden de gebreke unde klaghe tuschen Hicken Boyngen unde der van Inehusen wegene. Vorder soe wil juncker Edo dat soe beschicken, dat Eghere Tannen hovetling recht unde ghelijck sall schen umme de erve unde guedere van Tadeken to Roeffhusen up eynen beschedenen dach. Juncker Edo wil oek schicken unde foegen, dat Nannen to Santhorste sall wandel unde gelijck scheen to redelicheit voir syne wunden unde lamelze van den jennen, de yd eme ghedaen hebben. Vorder meer ys bedegedinget, weer sake dat de eddele gravynne in Oestvriesland unde juncker Enno greve vorscr. unde de ere to forderen unwillen quemen myd den greven van Oldenborch, soe dat he der sone nycht en wolde holden iffte volghen, alze to jaer ghedegedinget waert to Quakenbrugghe [*] van heren unde forsten, soe en wyl juncker Edo unde de syne sick nycht todoen to den greven von Oldenborgh, noch ene edder de syne trecken noch halen in Vriesland, sunder wil dair to sitten eyn halff jaer edder lenger hen tor tijd, dat syne lande unde luede de dyke hebben wedder begrepen in Rustringen etc., unde dairnae wyl sick juncker Edo jo gheboerlichen hebben to den eddelen juncker Ennen greven vorscr. ende to syner eddelen leven moder der grevynnen unde to eren landen unde lueden. Vorder umme dat begrip van den doetslachten, de leyder in den landen scheen, dat men dat over alle de lande uppe eyne maneer helde, wil sich juncker Edo myd den synen bespreken in den besten, unde junckern Ennen des eyn fruntlich antworde dairup wedder to scryvene, unde de ene des anderen undersaten alleweghe guet recht laten to wedderfaren unde doen to beyden syden, alze desse vorscr. puncte unde artikle ghedegedinget synnen unde besloeten tuschen juncker Ennen, den greven vorscr., unde juncker Eden, hovetling, unde den oren, dat sall oek soe mede syn ghedegedinget tuschen juncker Eden vorscr. unde Heren Maurizes, to Dornum unde tor Fredeboreh hovetling, desse puncte unde stucke vast unde wal to holdene to beyden syden. Hijr weren mede an unde over de werdighe unde erber mester Hicko van Dornum, proest to Emeden unde licenciaet im keyserrechten, unde de erber unde vrome Hero Ommekens, to Esende unde Witmunde hovetling, Eyleke to Uphusen, Aelryck tor Papenborch hovetlinge, unde de vromen ende beschedenen mans Abeke Ennens to Awerke, Gayke Ukens to Berum, Ulbet to Norden, Hayke Hattingen to Marienhove, amptlude, Haye Merkels van syden junckern Ennens des greven vorb., unde de erber mester Haye kerckhere to Jever, Ike Lubbe Onneken sone hovetling, Hinrick Scroeder voget to Jever, unde junghe Dure van juncker Eden syden. Und desser nottulen synnen twe, de ene uthe der anderen ghesneden myd ener hand ghescreven, der eyn itlick deel ene hebben to sich ghenomen. Datum anno Domini millesimo quadringentesimo septuagesimo septimo, die quo supra.
