| Nummer:oub0980 | Datum:Quakenbrück, 15. Okt. 1476 | Overlevering:Editie | Vindplaats:Ostfriesisches Urkundenbuch, II, S. 79, nr. 980 |
Friedensvertrag zwischen dem Bischof von Münster als Administrator von Bremen, dem Stift und der Stadt Bremen, der Gräfin Theda von Ostfriesland, den Städten Lübeck und Hamburg einerseits, und dem Grafen Gerd von Oldenburg andererseits, vermittelt durch die Bischöfe von Osnabrück und Verden und Abgesandte des Kapitels von Münster und der Städte Münster, Osnabrück und Lüneburg, und der Hansa.
In dem namen Gods. Dorch rast unde vrede der heren, lande unde stede unde mede to nut unde besten pelegrimen, kopluden unde wanderne mannes, in up dach datum desses recesses tusschen dem erwerdigen unde hochgebornen fursten unde heren heren Hinrik, bysschope to Monster unde administratoren der hilligen kercken to Bremen, deme werdigen capittel, manschop, stat Bremen unde undersaten des gestichtes Bremen unde de des mit synen genaden to donde heben, der edelen vrouwen Theden, greveinnen in Ostfreslant, eren undersaten unde togewanten, ersamen borgermesteren unde reden der stede Lubeke unde Homborch dorch ere vulmechtigen unde alle ere hulpere an de enen, deme edelen unde walgebornen heren Gerde, greven to Oldenborch unde Delmenhorst an de andern syden, overmitz den erwerdigen unde edelen heren heren Conrade van Depholte, bischope to Osenbrugge, heren Bartolde bischope to Verden unde eren reden, deme werdigen unde erbaren domdeckene unde capittel to Monster, deme duchtigen ende gestrengen heren Gerde van Keppellen rytter, ersamen borgermestern ende radessendeboden der stede Monster, Osenbrugge unde Lunneborch, van den erliken radessendeboden der stede der dutschen hense darto geschicket, eyn stede vast vrede unde sone des unwillen unde vede, dar de vorgen. parte inne gewesen sint went an desse tiit, de sone erer eyn deme andern geven wil unde sall der vede halven sunder argelist; unde alse dan de erwerdige unde hochgeborne forste her Hinrik, bischop to Monster und administrator to Bremen vorgen., mit synen togewanten unde hulperen gewunnen unde ingenomen hefft de slote unde veste Harpstede, Westerborch unde Altena mit eren tobehoringe unde de Santborch gebouwet unde upgeslagen, so willen unde solen de vorgen. here van Monster unde Bremen de Westerborch mit ere tobehoringe ungebroken mit der reschop, (de)[*] daruppe weren, do de overgeven wart, overantworden dan den erwerdigen heren bischopen to Osenbrugge unde Verden eder ere enen, de dan de Westerborch mit eren gewunnen rechten solen stellen in vryg seker beholt des edelen heren Gerdes graven to Oldenborch unde Delmenhorst vorgen. mede to behoff Johan Barnefurs unde synen moder, unde de veste offte slote, geheten Altena, Santborch unde wat veste an beiden syden gebouwet, gemaket, ingenomen eder gewunnen sint an deme Weserstrome in desser vede, solen de jene, de inne heben unde sich der anthen, van stund breken unde nederleggen unde an beiden syden nicht weder bouwen eder upslan, unde dat slot unde vogedye Harpstede mach de erwerdige unde hochgeborne forste, bischop to Monster unde administrator to Bremen noch viff jar na datum desser nottelen neistvolgende innebeholden; sunder na vorlofe der viff jar willen unde solen de vorgen. here bischop to Monster unde administrator to Bremen unde syne nacomelinge datsulffte slot ende vogedye mit synen tobehoringe, alse dat nu gelegen is, ungebroken, unvordorven unde unvorhouwen stellen in hande der erwerdigen heren bischopen to Osenbrugge unde Verden vorgen. unde ere nacomelinge semptliken eder erer eynen, de dan datsulffte slot unde vogedye mit erer tobehoringe solen overantworden deme edelen juncheren Jacope, greve to Oldenborch unde Delmenhorst, to syner unde synes veddern heren Gerdes greve vorgen. enen itliken van en to eren rechte, unde offt juncher Jacop vader desser tiit vorstorve, dan de upgen. heren sodane slot solen stellen in hande, dar sich dat mit rechte gebort; unde de vilgen. her van Monster unde Bremen, syn werdige capittel to Bremen, manschop unde stat Bremen, unde alle, de dat slot unde vogedye hebt helpen wynnen, solen alle ere gewunnen rechticheit, (de se) [*] darinne mochten heben, affstellen unde laten in hande unde to behoff vorgen., unde dat alsulk wal besorget werde, willen unde sollen de gen. her van Monster unde Bremen, syn werdige capittel unde stat Bremen, besundere breve upgeven in guder vorwaringe vor sich unde ere nacomelinge to lovene also sole geschen unde vullentogen werden, unde de erberen domdeckene unde capittel, borgermester unde rait der stat to Monster alsulk ter kunschop unde wytlicheit mede besegelen. Vorder umme gefangene, (de) [*] beiden parten sint affgegrepen, is besproken, gededinget unde gesloten, dat de alle solen quyt, ledich unde loes syn der gefencknisse, utgesecht de gefangene, (de) [*] de edele her Gert, greve to Oldenborch unde Delmenhorst unde syne togewanten, der edelen vrouwen Theden, greveinnen in Ostfreslant, ere undersaten unde hulperen affgefangen hefft, unde wederumme, wes de ere deme edelen heren Gerde, greven vorgen., heben affgegrepen, de hyr buten sint bescheden mit desser degedinck nicht quyt to synde, unde tusschen den partenn, naemptliken deme edelen heren Gerde, greven vorgen., unde vrouwen Theden, greveinnen vorgen. unde eren undersaten unde landen, sal eyn itlik by synen rechte unde weren bliven. Unde alse das de edele her Gert, greve to Oldenborch unde Delmenhorst vilgenant, vele mer unde drepliker gefangen hefft dan de erwerdige unde hochgeborne furste bischop to Monster unde administrator to Bremen unde syne hulper, so willen unde solen de vorgen, her van Monster unde Bremen unde de ersamen borgermestere, rait unde gemenheit to Bremen darvor geven unde to willen wall betalen deme edelen heren Gerde greven to Oldenborch unde Delmenhorst unde synen erven teyndusent enkell golden Rinsche gulden eder in golde payment ere gewert bynnen Oldenborch in ere vryg secker beholt, unde des gude besegelde vorwaringe unde vorwyssinge doen, so dat up sunte Andree dage nu erstkomende twedusent, in der hochtit eder achte dagen to Passchen twedusent, sunte Johannis Baptisten nativitatis twedusent, unser leven Vrouwen dage nativitatis twedusent, unde over to sunte Martini twedusent golden Rinsche gulden so vorg. is, allet negest na eyn ander volgende wall to willen van en to werdene to betalen unde darmede alle er affgefangenen quyt ere gefencknisse up ene olde orvede, unde doch eyn itlik der gefangenen an beiden syden enen fanckgulden unde enen stockgulden, de jene geseten heben, ut to gevende solen vorplichtet syn; hyrmede sall ok alle unbetalt gelt quyt syn, utgesecht de gefangene, de vor deme dinxdage na nativitatis Marie neistvorgangen eren ende gedegedinget genomen unde beholden heben up borgen eder eren egene geloven van deme edelen heren Gerde greven vorgen. Vorder is gededinget, dat ok sall gescheden unde quyt syn, vorsath unde vorsonet alle naem, roff, brant, schade, (de) den parten unde alle eren togewanten undersaten, borgeren, kopluden unde inwoneren geschen is, dat ene tegen dat ander geslagen, gerekent unde compenseret, unde wat sake hyrinne nicht affgededinget en sint, sal eyn itlik part by synen rechten bliven, unde mach dat mit rechte vordern. Ock solen de heren ere undersaten, geistlik unde wartlik, under deme andern beseten, in rouwliker brukinge ere rente, rechte unde privilegien bliven in mathen dat von oldinges gestan unde geholden is sunder besperinge unde jemendes indracht, unde alle koplude, pelegrimen unde wanderne manne geistlik unde wartlik solen vry secker up eren gewontliken tollen mogen then unde wanderen mit eren personen, haven unde guderen, unde de keyserlike vrye strate to water unde to lande sall geholden werden velich, alse billick van Gode unde rechtes wegene gebort. Und up dat dyt alse vorgescr. is, stede vast unde unvorbroken geholden werde, so willen unde solen de edele heren Gert greve vorgen., syne edelen sone, junge greven to Oldenborch unde Delmenhorst, dat capittel, manschop unde stat Oldenborch, loffte unde vorsegelinge don in guder formen unde wederumme also ok to geschende van deme werdigen capittel, manschop unde stat Bremen, allet sunder bedroch, nye funde, exceptien eder argelist. Unde desses to vorderer bekantnisse der warheit so heben wy Hinrik, van Gods genaden bisschop to Monster unde administrator to Bremen, unse secret, unde wy Gert, greve to Oldenborch unde Delmenhorst, unse signet up spatium desser nottelen don drucken, und wy Conrade van Depholte, van Gods genaden to Osenbrugge, unde her Bartolt van derselven genaden Gods to Verden bisschope, dat wy mit hulpe der werdigen erberen gestrengen unde ersamen domdeckene, hern Gerde van Keppelen rytters unde frundes, des capittel der kercken, borgermestern unde radesfrunden der stede Monster, Osenbrugge unde Lunneborch dyt wo vorgescr. gededinget heben, darumme ob to vorderer vestnisse unse secret mede up spatium desser nottelen don drucken. Datum Quakenbrugge, anno Domini millesimo quadringentesimo septuagesimo sexto, des dinxdages na Calixti martyris.
